ZALEN July 29, 2025 : Joint Civil Society of Mizoram (JCM) chuan Kawnpui – Sairang inkar kawngpui chhiat lutuk avanga Mizoram chak lakna dan chah a nih avangin hemi kawng a lo that theihna atan hma a la a. Kan hmalakna ten rah tha chhuahin Mizoram Sawrkar, Mizoram PWD leh NHIDCL ten kawngpui a lo that theihna atan hian an theih tawp an chhuah niin an hria a, an chungah lawmthu an sawi.

Kawnpui – Sairang inkar kawngpui chhia avang hian Mizoram chhungah nitin mamawh - ei leh bar tur te, Petrol leh Diesel, Insakna bungraw hrang hrang leh Medical Supplies thlengin phurh luh hleih theih anih loh avangin, thil man a sang chho zel niin Joint Civil Society of Mizoram chuan an hria a. 

Thil man sang hian mipuite tan, a bik takin mi harsa leh rethei zawkte tan buaina nasa tak a siam thin a. Chuvangin JCM chuan sumdawnna hrang hrang khawihtu zawng zawngte chu Mizo tlawmngaihna leh rinawmna vawng nung tlatin, hlawkna uchuak um lovin, mipui tana tha tura ding tlat tur leh an bungraw neih ang ang te pawh chheprelh lo turin an ngen a ni.

Joint Civil Society of Mizoram chuan thil man a san zel lohna tur a hma la turin Sawrkar an phut a. District tinah thuneituten an thuneihna hmang tangkaiin diklo taka thil man a san lohna turin Dan leh Thupek kengkawh tlat turin an ngenin an beisei bawk a ni.