ZALEN June 05, 2026 :Social media leh chanchinbu thenkhata Lawngtlai district, Darnamtlang khuaa tuihri (Acute Diarrhoeal Disease - ADD) leng mek anga sawi chu thuneituten a nih loh thu an sawi a, thi nia sawi awm pawh a hma lawka thiamna tak tak nei lovin a enkawl a ni tih hriat chhuah a ni.

Bungtlang South PHC huam chhung, Ngengpuitlang Sub-Centre Clinic hnuaia awm, Darnamtlanga hri leng a awm tih an hriat hian sorkara thawktutem an enfiah nghal a, thi nia sawi hi a thih hma lawkin damdawi thiamna pangngai nei lo (unqualified private practitioner)-in a enkawl a ni tih an hre chhuak a, a thih chhan tak hi an la chhui zui mek.

Mi rintlak takin ZALEN a hrilh danin damlo hi Myanmar daktawr-in a enkawl hnu lawkah in lam an pan laiin a thi a. "A hmaa Kakichhuah-ah hri a len pawh khan Myanmar daktawr (a lem nia hriat?) hian opium a lo chawh a ni awm e," a ti a. Tuna hri leng nia sawi hi boruak a daih deuh hnuah sawrkarin hmalak an tum a ti bawk.

Medical Officer, Bungtlang South PHC; AYUSH Medical Officer, Tuithumhnar AB-HWC leh Ngengpuitlang Sub-Centre Clinic-a health worker te chuan Ningani khan Darnamtlang hi an tlawh a. In 115 awmna khuaah hian kawthalo pali awm mekin pahnihin OPD an pan a, pakhat chu damdawi inah dah niin mi dangte erawh in lama enkawl an ni.

Heng mite hi Pathianni atang khan an nuam lo tan hlawm a, a hmain kawthalovin a ken tel - luak, khawsik leh pum nuam lo an neih an inhre hlawm lo va, an ek erawh a eng hle.

Thawktute hian khuaah hian ORS packet leh damdawi mamawh tul zual an dah nghal a. Ek leh tui pawh a dinhmun hriat chian nan laboratory-a en turin an la nghal bawk.

A hmuna an thil hmuh atanga a lan danin Darnamtlangah hian tuihri a leng tih fiahna a awm loh thu thawktute hian an sawi a. A vei nia sawi hi an la tlem hle a, hri leng darh ang thil engmah a la awm lo tih an sawi.