ZALEN October 19, 2025: Tunlai hian Mizoram hmun hrang hrangah sazu a puang mek a. Sazu puang hi tûr hmanga hrai an nih vangin leh heng sazu thite hi chakaiten an ei palh theih vangin chakai ei a him lo thei tih agriculture mi thiamte chuan an sawi.

Tunlai hian Mizoram hmun hrang hrangah rawthing (mau) tâm vangin sazu a puang nasa hle a, sazu hi district tinah a puang nia hriat niin buh thar rang leh buhban hmun eng emaw zat an bei tawh a. Buhpui pawh an beih leh rin a nih vangin hmun eng emaw zatah sazu tihrem nan tûr hmanga hrai a ni a. Tûr hmanga sazu hraite hi thenkhat lo bul vau leh luiah lutin a thi hi chakaiten an ei ve thin avangin mipuiten chakai leh lui lam sa ei lo se a him tih agriculture mi thiamte chuan an sawi. 

“Sazu hi tûr hmangin kan hrai a, khawi hmunah nge an kal zel kan hre lo a. Sazu thenkhat chu lui lam pan an awm niin kan hria a, hengte hi luia cheng nungchaten an lo ei ve thin avangin fimkhur thilah lui lam sa hi mipuiten ei lo se a him ber hrihin kan hria a ni,” tiin agriculture department thawktu pakhat chuan ZALEN a hrilh.

Agriculture department thawktute chuan buh thar rang leh buhbante sazuin a khawih hnuah buhpui pawh a la khawih mai thei tih an sawi bawk a. “Sazu hrai hi kalpui zel kan tum a. A hma lam kha chuan buh nen tur hi kan pawlh a; mahse, sazuin an ei tha duh lo nia kan hriat vangin nghathu rawh hmui nen chawhpawlha hrai leh kan tum a ni,” tiin department thawktute chuan an sawi a. Buhpui hi November thla velah a thar tlangpui a, sazuin a beih leh theih vangin inring rengin department lam chu an awm niin a sawi bawk.

Agriculture department thawktute chuan sazu atangin natna engemaw zat inkaichhawn theih anih avangin mipuite fimkhur se an duh tih an sawi a. Khawsik, tha na, tihrawl na, chau, thalbe vung, pumna leh kawthalo, luak, ruhchuktuah vung leh na, taksa durh leh pan te a awm a nih chuan doctor thiamte pan vat a pawimawh tih an sawi.

Sazu atanga natna chi hrang hrang pumpelh anih theihnan in leh a vel vawn fai, inchhung a sazu luh theihna tur kua leh awng tih phui, ei leh in ningnawi paihna felfai tak siam leh sazu luh theih lohna tura siam te, thang kam te a pawimawh niin an sawi a. Sazu nung lai man emaw a thi kan khawih dawn a nih pawhin kut lawnga khawih loh a him ber tih an sawi bawk.