ZALEN August 10, 2025: Khualzin tam zawkin Mizoram an tlawh theihna atana Mizoram chanchin insawisiak, ‘Narrating Mizoram: A Tales of Our Land - Storytelling Competition’-ah Serchhip district an thiam ber a, Serchhip district aiawha tel Lalruattluanga leh Lalthanzami Chhangte chu pakhatna an ni.

‘Narrating Mizoram: A Tales of Our Land - Storytelling Competition’ hmawrbawkna hi Zirtawpni zan khan Ignite Studio, Khatla-ah neih a ni a. A kharna inkhawma khuallian, Tourism Minister Lalnghinglova Hmar chuan, “Kan ram chanchin hi khualzin mite tlawh châk tura kan sawi thiam phawt chuan mi tam takin tlawh an châk mai dawn a ni,” a ti.

Tourism Minister chuan tourism department-in zin mite hip nan leh ram hmun pawimawh leh nuamte chanchin vawn nun nana Mizoram district hrang hranga hmun pawimawh behchhana thawnthu sawi hmanga inelna buatsaih a ni chu lawmawm a tih thu a sawi a. “Kan ram, kan hnam leh kan hmunhma chanchinte ngaihnawn taka mi dang hnena kan sawi thiam chuan a ngaithlatute thinlungah a taka hmuh ve châkna a tuh a, chu chu kan rama tourism tihhmasawnna kawngah thil pawimawh tak a ni a. Mizoram hmun hrang hrang thawnthu sawia inelna buatsaihna hian zin mite hipna kawngah hmasawnna a thlen ngei ka beisei a ni,” a ti bawk.

‘Narrating Mizoram: A Tales of Our Land - Storytelling Competition’ hi district hrang hrangah neih niin district tina pakhatnate chu an inel leh a, a pum puiah lawmman 1-na chu Serchhip district-in lain lawmpuina thuziak leh pawisa fai Rs.50,000 an dawng a, 2-na chu Saitual district niin Rs. 30,000 an dawng a, 3-na lawmman chu Khawzawl district-in lain Rs. 20,000 an dawng a ni.