ZALEN September 26, 2025: Mizoram Transformation Movement butsaihin September ni 25, 2025 zan khan Mizoram hmasawnna atan "Thuneihna Insemzai" chungchang zirhona buatsaih a ni. Zirhona hi Donum Dei Restaurant, Dawrpui Vengthar ah neih niin F Zothanzuala'n sawihona a kaihruai a, Prof J Doungel, MZU chu resource person a ni. He zirhona hunah hian mi thahnemngaite, MZU Research Scholars te leh zirlai mi 60 chuang an tel a ni.

Thuneihna insem zai - Decentralization of Power hi Panchayati Raj Institution kalphung, India danpuiin a lo siam tawh zul zuiin hman ve a nih theih dan zir leh sawiho a ni a. Panchayati Raj tih hming hi Mizo rilruah a tlak nat loh avangin hemi zulzui tho hian Village Council pawh Mizoram-ah kalpui a ni. Mizoramin Village Council Act 2025 Mizoram Assembly in a pass tawh pawh hman thuai theih chakawm thu sawi a ni a, hemi hi hman a nih hunah chuan Village Council te thuneihna a sang lehzual dawn a, hei hi khawtin hmasawn na atan thil tha tak, thuneihna semzainaah an ngaih thu an sawi a ni.

Mizoramin thuneihna semzaina kawnga a hmabak pawimawh em em mai chu; District tin ah hian "District Development Committee/Board" din theih hi a ni a; hei hi State danga 'Zilla Parishad' an tih aiah 'District Development Committee/Board' hming hi vuah theih a ni. Hetianga District tinin mahni district hmasawnna tur a rel theih hunah chuan mipui kutah hmasawnna a awm nasa lehzualin a chak zawk dawn bawk a ni. Tin, hemi atan hian Central atang pawhin funding hranpa rawn kal theih dan a awm niin a lang bawk an ti.

Chuvangin mipui kutah thuneihna tam zawk a awm theih nan Mizoram Transformation Movement chuan 'District Development Committee/Board" hi Panchayati Raj Institution kalphung zuiin siam theih ni se tha an ti a. Hetiang ti theitu Mizoram sawrkar pawh hma la turin an ngenin an beisei a ni.