- C Vanlal Ruaia, 9862569310

Kum 2017 vel atang khan Aizawl Greater Water Supply Scheme Phase 3 (Luang­ mual Industry Brig. T. Sailo Plan) thlang Setlaklui mawng atanga lakna tur chu SIPMIU (State Invesment Project Management and Implementation Unit) chuan thawk in, Tlawngkam Se­tlak lui chhuah atangin thir pipe lian feet 3 dia­meter an rawn phum chho a. Sakawrtuichhun kawng Industry peng ah lo chhuak chhoin Ramrikawn ah Chawlhhmun (Ropaia bawk) ah lo kal zelin Vaivakawn-ah Laipui­tlang tuikhuah ah a lut a.

He Pipe lian phum atang hian hmun dang zawng zawng chu an siam tha in an metal leh vek tawh a. Luangmual industry peng atanga Ramri kawn KM khat emaw vel lek hi High way tur a ni a, tiin, compensation la tur te nen tih fel loh in, kawng hi pipe phum atang khan siam that ve a la ni ta lo reng reng a. Ruah a sur in a diak em em a khua a that leh a khu luih luih mai a ni.

Tin, He kawng hi a lun em em a Aizawl leh Industry hmunpui in pawh na kawng a ni a. Industry chawm turin Raw material phur Motor lian pui pui Ke 12 nei thleng­in an tlan reng a. Industry atangin Hospital mamawh chawm tur in Oxygen supply, Insakna hmanrua Dynaroof te Brick/ Checkers tile, Tuizem Sintex etc. phurin an tlan reng bawk a. Tin, leivung paih leh quarry lung leh rora phur an tlan reng bawk a. Tin, Picnic spot leh Resort/recreation hmun a tam em em a, School picnic-in an tlan tam hle bawk a. Tin, Furpui ah Vaivakawn/ Company peng lei a chet a Airport panna (alternative rout) pawimawh tak a ni.

Mipui khawngaih vangin MLA in a siam : He kawng hmang tu Industry rama cheng mipuite, Sakawrtuichhun, PTC Lungverh, Aizawl Sahuan, Central Jail veng ten an tuar rei tak em avangin MLA TBC Lalvenchhunga (Adviser to CM) hmalakna in Luangmual Industry peng leh Ramrikawn inkar KM 2 vel chu Kum 2024 December khan resurfacing alkatra chuan an metal ta a. A lawmawm in Mipui pawh an lawm hle a. Mahse vanduai thlak takin kawng siam hi Highway tur a ni a, laih chhiat leh tho tur a nia tih hi a ri a. Chuvang chu a ni mahna, kawng siam qua­lity hi a hming maiin an ti ta vel mai mai ni awm tak a ni. 

Kawng hi Bitumen in a hneh lo em em a, apan em em bawk a. Kawngchhak lam ah hman deuh a side drain Concrete zut sa te chu lei in a hnawh vek a, tihfai a ni lova. Kawngchhak atanga tui hawk lo luang chu kawng a bova, kawng ah chuan a dil pung mai a. Chung chu motor lian chuan a rawn dai zit ziai ziai mai a ni. Metal road pan te chu a thuah fai a ni leh mai a. Side drain sial miah lova kawng chhak ruam zawk si a tui tling tur a luanna tur siam miah lova an kal san thei hi chu thil mak tak a tling. 

Highway chu lai dawn pawh ni se, a ram mipui tam takin Nitin eizawn nan a an hman a ni a, Mipui hmakhua (Public Interest) kha ngaihpawimawh ber tur a ni dawn lawm ni. Tuihawk dil in kawng laia chirhdiak a kal san chu a khu ah a lo chang leh a. Sum tam tak a kal ral tho si a. Kan sawrkar policy inrenchem (austerity measure) nen chuan a in mil mawlh lo.

Kan Sawrkar thar hi kawng siam ah nana na chuan an tangin kawng pawh an siam tha, a hnum zuih mai a. A thrill ve pheng phung lova. Chu tih laiin Ramrikawn-via- Luangmual Industry peng hi chu an metal hman tawh lovang. Mahse, kan sawrkar hian side drain tal hi han sial se, mipui phunselna chu a bo deuh mahna. Kawng dung a Tuihawk kawngbo, dil pung ho hi an luan bo chuan metal road tha lai hi tuiin a chiah lovang a, a chhe zel tur hi a veng dawn a ni. Furpui hma ngeiin sial a nih loh chuan a hma ang thova kawng chhia a ni leh dawn.