- JB Foundation 

A CAUSE FOR PAWS

Tunlai hian ran chhuak te man leh inchawitir chungchangah thu sep sep, vengtinin an tihdan inanglo tam tak sawi tur a awm nual mai a. Ran man te thihna hial a thlenna leh ran man te lo tihriral mai te a awm avangin The Mizoram Animal (Control & Taxation) Act, 2014 in ran man leh hren, a lo humhim dan tur leh tih zawm zel dan tur a sawi hi zawm ani chiah em tih I han bihchiang teh ang.

1. Dan in a remtih angin mi tupawh ram neitu emaw, a in leh lo enkawl lai (property) engpawh ran in a tihchhiat sak anih chuan Local Council/Village Council member-te hnenah a zualko thei a, LC/VC member-te an remchang lo anih pawhin LC/VC Secretary thu in ran chu hren/man (seize) theih a ni.

2. Ran in mi pawi a khawiha a in leh lo emaw thlai a tihchhiatsak a, a chetvelna a a lo inhliam palh a, thih hlauhawm khawpa hliam a nei anih pawhin ram neitu in mawh a phur lovang. Hetiang dinhmunah hian ran damlo emaw ran ruang chu Village Council hriatpuina in a neitu hnenah a rang thei ang ber a pek let tur a ni.

3. Village Council chuan ran a hren emaw a man te reng reng a chhinchhiah tur a ni a. Sub-section (1) leh sub-section (2) hnuai­ah ro a rel tur a ni.

4. Sub-section (1) hnuaia man ran eng pawh LC/VC chuan hetiang hian a chhinchhiah tur a ni.

I. Ran hren emaw man zat leh eng ran nge tih chiang takin a chhinchhiah tur ani.

II. Ran hren emaw man ni leh hun a chhinchhiah tur a ni.

III. Ran man tu leh address a chhinchhiah tur a ni.

IV. Ran neitu hming (hriat anih chuan) chhinchhiah a, a man tu hnenah a neitu hming copy pek tur a ni.

5. Village Council in ran hren emaw man a nei anih chuan, darkar 24 chhungin khawtlang mipuite hnenah a puangzar tur a ni.

6. Local Council/Village Council in ran a hren emaw man, chaw hrai leh chawi chungchang

I. Ran hren emaw man reng reng riltamin an awm tur a ni lova. Local Council/Village Council chuan an mamawh khawp chaw leh tui a pe tur ani.

II. Hren emaw man an nih chhunga an ei leh in atana senso zawng zawng chu government rate angin ran neitute’n LC/VC an pe leh tur a ni.

7. Ran hren/man LC/VC hnen atanga khul chhuah chungchang

I. Village Council - in ran a hren emaw man a neih reng reng ran neitu in khulchhuah a duh chuan, Local Council/Village Council chuan THE MIZORAM ANIMAL (CONTROL & TAXATION) ACT, 2014, Chapter-III, sub-section (2) of section 8 hnuaiah hren an nih laia ei leh in atana senso zat (feeding charge) la in a neitu hnenah an pe let leh thei ang.  

II. Ran neitu chuan VC hnen atanga ran a khulchhuahin receipt la in register-ah chhin­chhiah tur a ni. 

8. Ran neitu in ni 7 chhunga a ran a ngaihven lo anih chuan hetiang hian hmalak tur ani. 

I. Ran neitu in ni 7 chhunga a ran a ngaihven lo anih chuan, sub-section (5) of section 7 hnuaiah VC chuan public auction hmangin a ti ral thei ang.

II. Hun tiam chhungin a neitu in ran chu ngaihven mah se, hren emaw man anih laia ei leh in senso (feeding charge) LC/VC hnena a pe thei lo emaw, section 9 hnuaia chawi tur a neih ang te a chawi thei lo anih chuan LC/VC chuan tul a tih angin public auction hmangin a ti ral thei ang. 

Local Council/Village Council chuan sub-section (1) leh (2) hnuaia ran a hren/man te chu man man zawka a ti ral thei dawn lo anih chuan tul a tih angin hma a la thei ang.  

III. Local Council/Village Council member, secretary emaw an chhung leh khat emaw LC/ VC hnuaia nihna pawimawh chelh ten he section hnuaia ran zawrh te reng reng an lei thei lovang.

IV. Public auction hmanga ran hralhna chu LC/VC fund ah chhunluh tur a ni a. Amaherawh­chu sub-section (1) hnuaia ran hralhte reng reng a neitu in ni 15 chhunga phut let (claim) a nei anihchuan ran hralh­na man leh VC in an kawl chhunga ei leh in senso atana sum an hman te pe letin a la let leh thei ang.

KHAIKHAWMNA

THE MIZORAM ANIMAL (CONTROL & TAXATION) ACT, 2014, Chapter-III – in a tarlan angin Local Council/Village Council in ran hren emaw man a nei anih chuan, darkar 24 chhung­in khawtlang mipuite hnenah a puangzar tur a ni. 

Ran hren emaw man reng reng riltamin an awm tur a ni lova. Local Council/Village Council chuan an mamawh khawp chaw leh tui a pe tur a ni a. Local Council/Village Council - in ran a hren emaw man a neih reng reng ran neitu in khulchhuah a duh chuan, Local Council/Village Council chuan THE MIZORAM ANIMAL (CONTROL & TAXATION) ACT, 2014, Chapter-III, sub-section (2) of section 8 hnuai­ ah hren an nih laia ei leh in atana senso zat (feeding charge) la in a neitu hnenah an pe let leh thei ang. 

Ran neitu in ni 7 chhunga a ran a ngaihven lo anih chuan, sub-section (5) of section 7 hnuai­ah LC/VC chuan public auction hmangin a ti ral thei ang. Local Council/Village Council member, secretary emaw an chhung leh khat emaw Local Council/VC hnuaia nihna pawi­mawh chelh ten he section hnuaia ran zawrh te reng reng an lei thei lovang a. Hun tiam chhungin a neitu in ran chu ngaihven mahse, hren emaw man anih laia ei leh in senso (feeding charge) LC/VC hnena a pe thei lo emaw, section 9 hnuaia chawi tur a neih ang te a chawi thei lo anih chuan LC/VC chuan tul a tih angin public auction hmang­in a ti ral thei ang.