Tualthattu Maubawk Veng chhungah awm zui rem ti tawh lo

ZALEN August 24, 2025 : Maubawk khawtlang chuan Runliani (80) thattu Vanlalmuanchhana kum 21 s/o Zairemmawii chu Maubawk Veng chhungah a awm zui an rem ti tawh lo. 

Maubawk Local Council, YMA, MHIP leh MUP chuan thuchhuah inṭawm siamin Ni 19th August 2025, Thawhlehnia Pi Runliani (Pi Luti) Kum 80, rawng taka thattu Vanlalmuanchhana kum 21 s/o Zairemmawii man chhuah ani hi kan lawm hle a. Theihtawp chhuahtu kan Mizoram Police-te thawhrimnaah Maubawk Veng chuan lawmthu a sawi tak meuh a ni.

Tualthattu Vanlalmuanchhana Kum 21 S/o Zairemmawii, Maubawk Kawn Veng (Vanapa Section) chu a phu tawk ang ngeiin na taka hrem ni rawh se. Tualthattu hi man chhuah anih atang hian Maubawk Veng chhungah a awm zui kan rem ti tawh lo an ti. 

Tarlan tawh angin Thawhlehni a Runliani (80), Maubawk thattu Vanlalmuanchhana chu nizan khan Police hmaah a inpuang a, Central Jail-ah dah luh nghal a ni.