Tui harsat chhan PHE in sawifiah

ZALEN Oct. 22, 2025 : PHE dept. chuan Aizawl khawpuia tui sem tur duh ang tawk a awm theih loh chhan a sawifiah.
PHE Engineer-in-Chief Zodinthari chuan thuchhuah siamin tui sem khaihlak chhan hrang hrang a sawi a, Kumin fur tan tirah khan Vaivakawn Zohnuaiah (Phase-III) Pipe line chu lei chein a tih chhiat avangin he Scheme atanga tui pump chhuah thin chu vawiin thlengin tui pump theih lova. Tlawng Reiek kai atanga Greater Aizawl Water Supply Scheme, Phase-I & Phase-II atanga tui pump chhuah thin pawh ruah a sur apiangin tui tihfim theih loh khawpa a nut nasat thin avang in tui pump chhuah theih zat tur pump chhuah theih ani thin lo bawk a ni.
Heti tak a tui a nut nachhan hi tlawng lui fintu luite ah mipuiin leivung an paih avang te, kawng laihna leivung an paih avang te leh ramhnuai leimin avang te a ni deuh ber a ti a. Tui nut san lai phei chuan NTU 1000 chuang te ni thin a ni.
Aizawl khawpuiin ni tin tui 38 MLD a mamawh laiin Greater Aizawl Water Supply Scheme, Phase-I & Phase-II hian ni khatah 25 MLD to 28 MLD chauh tui pump theih a ni. Hei vang hian Aizawl khawpui chhungah chawhrualin thla khat chhungin tui connection pakhatah tui vawi hnih-khat bak sem tur a awm thei lo a ti.
Phase-III Pipe line Zohnuai a mi hi siam mek a ni tih sawiin, PWD lamin kawng chhak lam leimin dawlna an siam ve mek a. Ruah a la sur fo avangin leimin hi a la tawlh zel a, hmasawn a harsa viau a, chuti chung chuan ngawrh takin PWD leh PHE te hian hma an la mek a. November thla chhungin tui pump chhuah leh theih beisei a ni a ti.
Aizawl khawchhungah hian mimal tuizem atang leh pipe line atang a tui leak ven hna theih tawp in Department in a thawk tih sawiin, hma pawh an sawn hle a ti a. Tui leak report na tur Water Leak Report Apps siam chu hmang tangkaiin vawiin thlenga he Application kaltlanga tui leak report lut zat chu 310 a chuang tawh a ti a, a rang thei ang bera siam that hna thawh nghal zel a ni bawk a ni.
Tui ren chungchangah te, ruah tui khawl chungchangah te, tui leak ven chunchangah te leh mipui in tur tui lak tibawlhhlawh thintu leivung leh bawlhhlawh te hi a paihna hmuna paih turin PHE Department chuan mipuite thawhpuina a sawm a, tun hnaia tui sem that theih loh chungchangah mipui te hriathiam tih a sawi bawk.