ZALEN August 25, 2025 : Vawiin khan Mizo Hnam Run inkhawm hun hnihnaah MNF Vice President Pu Lalchhandama Ralte (Leader of Opposition) chuan kumin independence day-a chief minister thusawi dik lo hrang hrang a sawinaah, “Tunah hian Super CM kan nei mek a ni,” a ti.

Lalchhandama chuan, “Independence Day-a Chief Minister Pu Lalduhoma thusawiah khan thudik zik tluak lo leh zirtirna dik lo a tam hle a. I-Day heti zat kan hman tawhah CM-ten kalphung awmsa hmangin - Inlawmna te, hnam pasaltha zahna te, state hmasawnna te, chona hmachhawp te, future vision te, inpumkhatna leh tanrualna thute an sawi thin.

“A thusawi dan kha a dangdai hle a, keimah ngeiin ka buatsaih a tihte hi a dik em? Zawhna lian tak a awm a ni,” a ti.

“Pu Duhoma’n leiba ₹ 13,584.80 Crore neiin bul kan tan, tia a sawi kha ZPM sawrkar hma kum 2023-24 BE figure a ni. RE-ah ₹12,709.29 Crore a ni zawk (hei hi GSDP atangin 32.29% a ni). Finance Commission 15-nain leiba neih a phal chin bituk (33.1%) aiin a hniam.

“Kum 2024-25-a ZPM Sawrkar Budget pharh hmasa berah leiba zat chu ₹14,034.76 Crore a ni - RE-ah 38.32% of GSDP a ni. Hei hi FC 15-nain leiba neih a phal chin (32.8%) a khum hial zawk a ni,” a ti.

“Contract hna Departmental Works thawh leh Restricted Tender chungchangah pawh hmanni lawka blanket approval ₹ 629.17 Crore an pekte kha kan ti ve lo ang titute hian sum bawm an zen nasa fe zawk tih a tichiang hle a. CM hian PMJVK, Tax-Finance, District Council, CSR zawng zawng a hnuaiah a lakhawm vek a. Minister/MLA-te tan tlawn loh theih lohin a inhung tawh a, tunah chuan Super CM a ni mek tawh a ni,” a ti bawk

Corruption do dan kalphung thar sawiin Chhantea chuan, an sorkar atanga ni 15 chhungin CBI consent an pe a. Mahsela, thla 6 hnu lekah CBI consent hi an sut leh nghal a. CBI consent an sut leh thu hi kan CM hian a sawi duh miah lo a ti.

“I-Day-ah khan kawng chhia sawi a hnekin, Central-in an mi duh tak NHIDCL Exe. Director min rawn pe a, a lawmawm hle. Tin, NHIDCL managing Director-in Delhi-ah min rawn hmu a tihte hi a mak a, ram mipui hmaa sawi tham a ni lo. NH 302 - Tlabung atanga Demagiri chu NHIDCL kutah hlan a ni ang, a tihte hi Demagiri hi Tlabung tho, Tlabung hming hlui a ni,” a ti bawk.