ZALEN March 31, 2026: Middle East-a indona thleng mek avangin internet hmanah hlauhthawnna a awm mek a, Red Sea-a hrui thlunte chu chat thei dinhmuna a dinga ngaih a ni.

Iran hian official tak chuan he tuipui hnuaia hrui inthlungte tihchah lam hawi hian vauna thu engmah tihchhuah a la nei lo a, hetih lai hian X-a account nei tam tak chuan US-Israel leh Iran inepna boruak zel hian thleng thei a nih thu an tar lang hlawm tih Hindustan Times chanchinbu chuan a tar lang.

Red Sea-a hrui thlun chah hnuhnung ber chu September, 2025 khan a ni a, kha thil a thleng chhan chu sumdawng lawng pakhat thirchakaiin a hrut chah vang a ni a, hemi tum tui hnuaia fibre optic cables chu a chat nual a ni.

Tunah hian Iran tantu tam tak chuan an social media kaltlangin Red Sea-a fible optic cables te hi tihchahah an vau mek thung.

Hei vang hian Houthis atanga beihna a thleng a nih chuan Red Sea cables dinhmun tur hi hriat theih a nih lo a ni.

International Cable Protection Committee chuan September, 2025-a thil thleng avang hian cable pali - South East Asia-Middle East-Western Europe 4; India-Middle East-Western Europe cable; FALCON GCX leh Europe India Gateway te a nghawng a ni.

Red Sea cable hi chat a nih chuan India in a hman nasa tak cloud service, digital payment leh AI device-ah te hian nghawng thui taka a nei dawn a, economic lamah nasa takin ramin a tuar dawn a ni.

Khawvel-a international data cable 95% dawn hi he tuihnuaiah hian a kal a, heng zinga 17 te hi India chuan a host a, Mumbai, Chennai, Cochin, Tuticorin leh Trivandrum-ah hmun 14-ah landing station a nei a ni.