ZALEN September 29, 2025: Cheng vaibelchhe 26 senga sak, Mizoram Engineering College, Pukpui Lunglei chu thawktu (staff) leh sum hman tur awm loh vangin a nihna tur anga hman tangkai a ni lo niin Comptroller and Auditor General of India (CAG) report chuan a tar lang.

CAG report, August 27, 2025-a Mizoram Legislative Assembly-a pharh takin a tar lan danin sawrkar laipui, Ministry of Human Resources Development hnuaia Rashtriya Uchchattar Shiksha Abhiyan (RUSA) kaltlangin Lungleia engineering college hi Rs. vbc 26 a din remtih a ni a. Ruahman dan chuan he college hi thalaiten thiamna leh degree sang zawk an neih theihna atan te, polytechnic zirlaiten an zir chhunzawm zelna tur leh sawrkar hnathawkte pawhin an thiamna an chher hriamna hmun tur atana duan a ni a. Ruahman dan chuan kum 2018-19 atanga hawn tan tum a ni.

Engineering college sakna atan hian February 12, 2015-ah inremna (MoU) ziah a ni a, April 5, 2016-ah work order pek chhuah a ni a. College sakna tur hi sawrkar laipui leh state sawrkarten 90:10 hmanga an thawh tur a niin sawrkar laipui tum tur Rs. vbc 23.40 pawh pek chhuah nghal a ni.

College sak hna hi April 22, 2016-ah tan a niin November 16, 2018-ah zawh fel a ni a, a sak hna hi M/s Mizoram Technocrats Compaany (P) Ltd. chuan an thawk a ni. Audit report tar lan danin Rs. vbc 26 hi building sakna tur liau liau a ni.

Hetih lai hian engineering college hi a taka hnathawk tur chuan zirtirtu leh thawktu dang a ngai a, hemi atana sum mamawh dilna pawh Mizoram sawrkarah thehluh a ni a; mahse, finance department-in March 20, 2014-a hna thar siam leh hnawh khah khapna a lo siam tawh avang leh sum dinhmun harsatna avangin RUSA lam dilna chu tihhlawhtlin theih a nih loh thu May 6, 2020 khan a hriattir a. Hei vang hian CAG-in audit an neih lai March, 2024 thleng khan Rs. vbc 26 senna engineering college chu kum nga hnuah pawh hman theih a la ni lo tih a tar lang bawk. 

Mizoram Engineering College-ah hian êng leh tui a la awm loh avang leh a panna kawng hi siam that a nih loh avangin lirthei kal vel tan pawh a buaithlak a. Chuvangin, a tul anga hmachhawp la awmte enfiah rang turin CAG chuan state sawrkarah rawtna a siam a ni.