ZALEN September 21, 2025: Comptroller & Auditor General (CAG) of India report, August 27, 2025-a Mizoram Legislative Assembly-a pharh takin a tar lan danin Art & Culture department hnuaia Mizoram State Museum thar chu Rs. vaibelchhe 3.22 sen a nih hnuah pawh kum 12 chuang hman theih lohin a awm tih a tarlang.

CAG report tar lan danin MINECO-a Mizoram State Museum thar sakna atan hian vbc 3.62 ruahman niin vbc 3 hi Ministry of Culture atanga hmuh a ni a, vbc 0.62 chu Mizoram state tum tur a ni a. March, 2006 khan sawrkar laipui chuan vbc 3 hi a rawn pe chhuak (sanction) a. Mizoram state PWD chuan in sa tur hian F. Lalmalsawma, Tuikual South, Aizawl chu tender hmanga thlangin in sakna atan hian vbc 3.22-in inremna siam a ni.

September, 2007 khan hna hi tan niin October, 2012-ah zawh a ni a; mahse, PWD hian kum ruk hnu July, 2019-ah Art & Culture department kutah an hlan ta chauh a ni.

Building hi sak zawh ni mah se museum-a awm tur show case, gallery, electric leh bungrua a awm lo a. Hei vang hian museum hi hman theih a ni hrih lo.

UD&PA hnuaia Aizawl Smart City Limited sum vbc 3.92 hmangin building hi chei that leh a niin gallery, ceiling, kangmei laka invenna, chhuat phah, kawngkhar, tukverh, air conditioner leh a dangte chei that a ni a. A chei that hna thawk tur hian M/s Zamzo Engineering Construction & Consultancy, Aizawl thlan an niin hna hi March 31, 2024-a zo tura tih an niin hun tiam chhung hian zawh hman a ni lo a ni.

Hetih lai hian May 1, 2024-a Director, Art & Culture-in a sawi danin museum-ah hian bungrua (furniture), eng, electric, air conditioner leh bungraw dang te chu rukbo a ni tih a sawi a. Museum sak zawh hun tur kum 2012 tih chu tih sual palh (typing mistake) niin kum 2019 tih zawk tur a nih thu te, hna zawh har a nih chhan pawh Ministry of Culture-in pawisa (third installment) a pek tlai vang niin a sawi bawk.

Museum tur hi ruahmanna tha (improper planning) a awm loh avangin vbc 3.22 hmangin sak ni mah se a chhung cheina a awm loh avangin Rs. vbc 3.92 sen belh a ngaih phah bakah kum 12 chuang hman theih lohin a awm phah niin CAG report chuan a tar lang a ni.