ZALEN September 7, 2025: Bamboo Development Agency (BDA)-in Export Import Business Training Centre for Entrepreneurs (EIBTC), Zuangtui, Aizawla an sak chu Rs. vbc 4.39 sen a nih hnuah pawh hman theih a la ni lo niin CAG report chuan a tar lang.

August 27, 2025-a Mizoram Legislative Assembly-a Comptroller & Auditor General of India report pharh takin a tar lan danin chief secretary kaihhruai State Level Export Promotion Committee (SLEPC) meeting, August, 2010-a neih chuan EIBTC sakna tur project report kimchang, Central Assistance to States for Developing Export Infrastructure & Other Allied Activities (ASIDE) hnuaia sak tur leh sawrkar laipuiin a sakna tur a tum vek tur chu a ruahman a. He project-in a tum ber chu state economy hmasawnna tur atan sumdawnna kalphungah te, thil lak luh leh thawn chhuah, thiam thil hrang hrang zirtir leh thildangte a tel a ni.

General Financial Rules, 2005 (GFR)-a Rule 150-in a tar lan dan chuan advertisement-a tender invitation chu Rs. nuai 25 leh a chung lam hu bungrua lei nana hman tur a nih bakah advertisement chu ram pum huapa chhuah chanchinbua pakhatah tal tar lan tur a ni.

Executive Director, BDA, Commerce & Industries Department, Government of Mizoram hnuaia test check (July-August, 2022) an neiha a lan dan chuan Ministry of Commerce & Industry, Government of India-in project mumal tak sawi awm lem lovin kum 2009-10 atanga 2011-12 leh 2013-14 atanga 2014-15-ah state chu ASIDE hnenah Rs. vbc 19.22 a pe a. SLEPC chuan pawisa an hmuh atang hian Rs. vbc 4.39 chu August, 2010 atanga January, 2015 chhungin entrepreneur-te tan EIBTC, Zuangtui, Aizawla sakna atana hman turin a ruahman a ni.

Project Director, Export Promotional Industrial Park Authority chuan June ni 28,2012 khan tender tel lova thuchhuah siamin EIBTC sakna turah firm pakhat hnenah architectural consultant anga thawhna tur a pe a. He hna inpeknaah hian rate emaw hlawh emaw, terms & conditions emaw tarlan a awm loh bakah contract siampuiah a sawm a. He firm hian June 28,2012-ah an terms & conditions chu hriattirin project ah hian a hmun (site) design siam, drawing leh a hmun mila senso zat tur estimate an siam bakah professional fee anga hlawh pek phutin project senso zat zawng zawng atanga 4% bakah structural design fee 1% pek an phut a ni.

June ni 29,2012-ah Project Director hian hnathawk tura thlan firm hnenah hian achitectural consultant an nihna tur chu pawmin hei hian rules zawm lovin ni hnih chhungin an tifel ta mai a. Firm chuan a sakna tur ruangam siamin a sak man chu vbc. 6.25 leh consultancy fee atan 5% (vbc .30) a beisei a ni. Building hi chhawng nga sak tur a ni chungin hun bi mumal tak siam a ni lo.

SLEPC in vbc 4.39 a ruahman chu November 2012 atangin department chuan hna an thawk tan a, October 2016-ah sum zawng zawng hi hman zawh a ni. July-August 2022 a enfiahna neihah building hi 70% chauh sak zawh a ni. Executive Director BDA chuan building sak zawh nan hian Director, Commerce & Industries ah March 2016 khan vbc 2.21 a dil belh leh a, sawrkar atanga chhanna a awm loh avangin October 2016 atangin building sak hna hi chawlhsan a ni. EIBTC Zuangtui chu cheng vaibelchhe 4.39 sen anih hnuah pawh sak zawh theih a ni ta chuang lo a, he project in a tum chu a hlawhtling ta lo niin GAC report chuan a tarlang a ni.