ZALEN, September 10, 2025: Cental YMA hnuaia rorelna sang, Central Coordination Committee (CCC) chuan October thla chawhnu lama inkhawmpui lian an neih tura an agenda turte thlifimin kum puan atana buk turin ‘Ruihhlo Do’ leh ‘Ram leh hnam humhalh’ an chhawp chhuak dawn.

Nilainia CCC thutkhawm vawi 103-na hi Central YMA Hall, Tuikhuahtlang, Aizawlah an pawl president, Lalhmachhuana kaihhruaia thukhawm hian turin inkhawmpuia rel turin YMA khawih panga leh sorkar khawih pathum an pawm bawk.

YMA hian October 21-23, 2025 chhung hian Tuisual Group-in Sakawrdaia YMA Inkhawmpui Lian an hmang dawn a. Heta rel turte hi branch hrang, group leh sub-headquarters atangin rawtna thlen niin hei hi CCC chuan a thlifim leh thin.

YMA khawih an chhawp chhuahte hi - ‘YMA inkaihhruaina leh nihphung leh hruaitute mawhphurhna ram pumah inzirtira neih ni rawh se,’ ‘Mizoram chhunga hnam dang sumdawng, phalna nei lo tam ta lutuk hi titlem turin YMA-in hma la rawh se,’ ‘Mizo hmeichhiaten hnam dang pasala an neih zel loh nan Central YMA hian inzirtirna nasa zawkin kalpui rawh se,’ ‘Mizo infiamnate chawisan a nih theih nan Central YMA-in hma la rawh se’ tih leh ‘Zohnahthlak chi peng hrang hrangte Mizorama chengte zingah chi bil hmalakna a awm tawh loh nan Central YMA-in hma la rawh se’ tih te a ni.

Sorkar khawih rel tura an chhawp chhuah pathumte chu - ‘Inner Line Permit (ILP) hi tun aia khauh leh awmze nei zawka kalpui a nih theih nan YMA-in sorkarah thlen rawh se,’ ‘Tui hnar humhalh dan siam ni rawh se (The Mizoram Water Source Catchment Area Protection Act & Rules)’ leh ‘Mizoram chhunga inkalpawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theih nan Mizoram sorkarin tun aia chak zawkin hma la rawh se’ tih te a ni.

Thutkhawm hian Central YMA Budget (2025-2026) ruahmanna pawh inkhawmpuia pharh turin a pawm a. Inkhawmpui thlengtu turten an inbuatsaih dan an sawi bawk.

CCC meeting-ah hian Aizawl City Branch aiawh, group leh sub-Hqrs aiawh bakah Central YMA hruaitu mi 240 an kal.