ZALEN August 18, 2025 : 2025 YMA Khawmpui Lian thleng tur Sakawrdai bul lawk khua Tinghmun chuan an dil siamchawp, Tingdil-ah conference palai te tana tlawh chakawm tur Lawngleng chi khat, House boat ang chi, mi engemaw zat chuan theihna tur chu Tinghmun Allied Farming Co-Operative Society (TAFCOS) chuan an tuk mek. 

He lawng hi YMA Khawmpui Lian pual tura an siam a nih rualin nakin zelah pawh he lawng hi an khaw tlawhtute tana hman chhunzawm theih turin an ruahman. A lawng hi Mizo pa In ang thei tura duan a ni a. TAFCOS chairman Lalawmpuia Biate chuan an khua dil lian tak Tingdil hi Tam dil aia lian zawk a nih thu a sawi a, khuah chawp niin a peng a tam tih ZALEN a hrilh a, conference kal mai ni lo, a hnu zela zinmite tan pawha an hmun chu tlawh chakawm tura hmalak mek a nih thu a sawi.

Tingdil hi Sakawrdai atang hian minute 45 vel kal a ni a, CYMA hruaitu lam pawhin rorel chhunga palai te hawi thawvenna tur atana Tinghmun lam hi lo inbuatsaih turin an chah tih ZALEN thudawnna chuan a sawi bawk.