ZALEN July 23, 2024 : Zoram Medical College & Hospital Laboratory Technical Staff Welfare (ZLTW) te chuan Indian Confederation of Medical Laboratory Science (ICMLS) in a duan angin July 17, 2025 atanga an hman tan National Medical Laboratory Professional Week (NMLPW) chu vawiin khan Voluntary Blood Donation Camp hmangin an khar.

ZLTW te chuan thawktu indaih lohna vangin harsatna an tawk tih National Medical Laboratory Professional Week kharna a kal ZALEN an lo hrilh a, Technician nghet pariat leh Project hrang hrang atanga lak mi 10 ten ZMC Central Laboratory an enkawl tih an sawi a, zirna In hrang hranga Laboratory Technician zir an hnena internship ti thin te awm lo phei se la chuan an indaih loh viau tur thu an sawi.

ZMC-a Technicial chuan an hnathawh phung sawiin, staff nghet pariat leh project a lak staff 10 te hian a pangngaia nitin an kal bakah zan tin mi pahnih emergency atan an in duty chhawk ziah an ti a, staff pariat leh project Kaltlanga rawh te hian emergency atan detailment an insiam thin a, An hlawh bak lawmmawn pek an ni chuang lo thung. Thawktu dinhmun an hriatchian avangin chawlh pawh an la ngai lo tih ZALEN an hrilh.

Staff pakhat phei chuan an inneihni-ah pawh a thawhpuite a lawmna a kal tur pawhin a sawm ngam lo tih a sawi a, a thiante indaih loh dan tur a hriat avangin anmahni puitu tur a rawih ringawt thu a sawi.

Zoram Medical College & Hospital Laboratory Technical Staff Welfare (ZLTW) te hian NMLPW denchhen hian ZMC&H Paediatric Ward tan Nebulizer - 5 leh Baby Weiging Scale -1 an pe a, July 17-23, 2025 inkar chhunga OPD-a thisen exam ngai, Blood Sugar leh HbA1c te chu a free-in an test sak vek a ni. Free-a an test sak hlut zawng hi Blood Sugar 207XRs. 50 =Rs.10,350 leh HbA1c XRs.350 = Rs. 39,900, a vaiin Cheng 50,250 man a ni. Vawiin-a Blood Donation Camp an huaihawt-ah hian mi 41 ten ZMC&H tan thisen an pe bawk a ni.

ZMC&H-a Central Laboratory-a an Head of Department Dr. Zothansangi, MD (Pathologist) pawhin an indaih lohna hi a sang hle a ti a, sawrkar-ah Lab technician hi 15 an dil belh tih a sawi a, mahse an dil zat hi an pe thei dawn lo a ti a, 10 an pe thei dawn niin an hria, engemaw chen chu an awlsam phah deuh a rin thu a sawi.

ZMC-ah hian January-June 2024 chhung khan damlo admit 61,413 an awm a, thisen test leh test dang an ti zat chu 2,25,740 an awm a, January - June 2025 chhung khan damlo 70,249 admit an ni a, test hrang hrang ti hi mi 3,18,595 an awm thu Dr Zothansangi chuan a sawi a, test tur an pun tak avang hian Laboratory Technicial indaih lohna hi a sang tawh hle a ti a, MUCHS hman hnuah inentir leh test tur pawh an pun nasat thu a sawi bawk.