ZALEN August 11, 2025 : BJP Mizoram chuan vawiin khan Karthar Inhlanna leh Political Session hun an hmang a, he huna thusawitu Palak bialtu MLA K. Hrahmo chuan ZPM chu issue base-a kal tum an nih angin central sawrkar pawhin issue base thovin min enkawl niin a lang a ti.

K. Hrahmo chuan, "India ramah National Party hi paruk vel kan awm a, a dang zawng hi chu Regional Party an ni thung a ni. Tun hunah hian National Party, BJP atang lo chuan Development a awm thei lo tih hi kan hre chiang ta hle a ni," a ti.

"Tun Sawrkar hi NDA-a tel tura Central hruaitute'n ZPM an dawr lai khan an zawm duh lova, vawiin ah chuan chumi rah chu kan seng mek a, issue base-in kan kal dawn an tih ang khan issue base chuan an kal ta a, chutiang bawkin Central pawh hian issue base thovin min enkawl niin a lang a, chuvangin Mizoram hian Central Base-a kan kal ve theih hun hi a nghahlelhawm hle a, chumi hnuah chuan vawiina Mizoramin kawng hrang hranga harsatna kan tawh te hi a kiam tawh dawn a ni," a ti bawk.

MNF chungchang sawiin Palak bialtu MLA chuan, "MNF-te hian NDA kan ni inti chung si a, NDA tak taka inhnimphum duh lo an nih zia hi a lang chiang hle a, a chhan chu, NDA an nih chuan BJP MLA-te nen an thutna rem danah a hriat tur a ni a, MNF te'n Sawrkarna an siam lai khan NDA-a awm tak tak ni se chuan, Mizoram ah harsatna khatianga nasa kha kan tawh a rinawm loh a, SEDP atanga sem tur cheng nuai thum (3 lakhs) pawh kha an neih a rinawm a ni. Nimahsela tuna an awm dan en hian NDA-ah hian an inhamtang hram hram a ni ber a, an kut a kham huna tlak thlak tawp thlenga awm an tum ni berin a lang a, kan Bible-in 'i lum leh lum la i vawh leh vawt rawh' a tih ang hian Political Party-te hi kan kal a ngai a ni," a ti bawk.