Nghilh luih Becca

Becca vànga ka nat zàn atanga a ni thumna a ni ta. Ka phone-ah chuan application tam tak a la awm; WhatsApp group hrang hrang ka awmnaa message-te pawh thuah fai sèn loh a la chám báng; mahse, ruak huai hian ka hre tlat a. Ka thluak pawh a ruak a, ka nun pawh a saruak!

Chutia ka awm chhúng zawng chuan ka ui duat, Leo pawh a hlim thei ngai rëng rëng lo nia! A zawi ngawih ngawih a, chaw pawh a ei tha peih meuh lo. A chángin min rawn liak leh zeuh thìn tih loh chu a fiam pawh kan infiam peih lo; a pu hi ka normal lo tih a hre thiam ve a ni ngei ang.

Tûk tin zan tin Leo chu ka la walk-pui fan tho a—phùrna tel miah loin. A harh deuh nán tiin kan walk thinna kawng ka thlâk a. Kan véng thlànmual panna lamlian ka chhuipui ta daih a.

Hmun a reha boruak pawh a thianghlim zâwk vànga chu lamlian chu panpui pawh ka ni hran lo. A chhan pawh ka hre chuang lo. Chutia walk-na kawng kan thlâk hnu achinah, tlémin Leo-a tha pawh a tho ve deuhin ka hria—kei, a pu ngei pawh hi.

Kár a liam hmain ka inngaihtuah harh a. Becca nènna kan inbiakna zawng zawng leh a number chena ka then fai diak hnuah, ka hriat rengna atang pawha Becca chu remove-a delete hlen ka tum lui tlat a. Amah ka hriat rengna chu a hàla hàl ral thak a nia ka duh ni!

Nat kha zahthlâk ka ti! Ka ná te kha ka indem lêt a; nêp  ka inti. Mahni bialnu pawh ni lo pasal neih dáwn vànga lo inlâk down viau kha mipa thawmhnaw ka ti lo ta tlat! Nun ná-a awm kha ka tum tawh lo bur a. “Joey, na tawh suh!” ka inti lui tlat thìn. Becca kha theih­nghilh ka tum lui tlat a ni.

Pangngai takin class pawh ka kal a. |hian­te kiangah ka nui lui a. Tûn hnua ka hriat chhuah tâka chu, puitling nuna “a dera nun” ninawmzia leh hahthlâkzia hi a ni! Dik tak chuan MZU leh a chheh vêl, Pu Lala dàwr leh La Push Café, MZU bus leh engkim mai chu … la pangngai vek mah se, ka tán chuan thil pangngai an ni thei lawk lo! Mahse, pangngai luih ka tum tlat a. A der pawh ni se, thiante nuih rualin ka nui tùr a ni. Ka hlim tùr a ni—a der tal pawh chuan.

Kohna dangdai!

Zan khat chu Leo nèn chuan phür takin thlànmual panna lamlianah chuan kan inzui leh a. Kan dàn ngai të bawkin zàn dár 7.15-ah thlànmual chhak step bula Hmáwng küng hnuai chu kan thleng leh a. Street light ëng tehchiam lo chuan step chu a èn thla raih a. Chu chu thlànmual tak zuk pawhtu chu a ni. Kan chhuk zui ngai lo.

Hmáwng hnuaia kan thut hahchawlh lai chuan Leo chu a tho thut a, a mei a thên a, a tei thuak thuak a. Nizàn leh zan hmasa pawha kan lo hmuh tawh hmeichhe pakhat, sáng tha zet mai, ka chen loh hial tùr, ngo zet, mask vuah ziah hian a German Shephard ui lian tha zet mai chu a rawn kai leh hi a lo ni a. Zanin chu biak ngei ka tum tawh a.

Kan piah deuhah an infiam a. Chu nula ni ngei tùra ka ngaih chu a nui her her a. A hnuah chuan a ui chu kalsanin an chhaka thutna rem lo zetah chuan a thutsan a. A phone a khawih a ni ang—a ëng vá mai.

Chumi zàn chuan biak ngei ka tum nula chu ka va pawh ngam ta lo.
~

Zan dár 6.45-a pèl det. Ka chaw ei kham chu chanchinbu ka bih zawk a. Ka phone message tone a ri karh a. Ka en lawk lo. Mahse, en tùrin eng ’rau emaw hian min mawlh tlat nia maw le!

Ka’n en chu number ka save loh hian WhatsApp message min rawn thawn a. ‘Zanin Leo i walk-pui dawn lo mi?’ tih zawng a ni.

Chu zawhna chuan min tháwng thar dawt mai! Ka theihnghilh tawh emaw ka tih thlarau kha a ni thei mai ang em? Engati nge Leo ka walk-pui dáwn leh walk-pui dáwn loh thu ka dawn leh?

A number chu ka ennawn leh ngat a—Becca number a ni lo. A nu number pawh a ni lo—a pa number pawh.

‘Tu nge aw…?’

‘Hei ka ui, Lenny hi a kal duh tlat lo a … in kawtah Leo a nghâk tlat,’ a rawn ti ta mai!

‘Tu nge ka ti alawm,’ tiin ka chháng leh ngat.

‘IG-ah ka follow che a. I hriat hnu chu ka nih ka inring.’

‘Ok,’ tih leh Leo chhuahpui chu ka rual a.

Ui leh ui kaitute

Kawtah chuan kha nula—mask vuah thìn chuan a GSD lian tha zet chu a lo dinpui a. A phone hmai la ëng reng chu rawn lek chhuakin min lo vai a. A lam chu muangchánga pan ka tum a; Leo erawh chuan muangchàn a duh lo a…

‘Cleo ka nia. Hei, Lenny,’ tiin a hming leh a ui hming chu min hrilh—nizàna biak ka tum tlat nula, ka biak ngam tâk loh khân.

Han biak vak ngaihna ka hre lo. ‘A ni maw,’ tih leh a lama bán phar ka rual a, ka chibai ringawt a! Ngawi rengin kan ui ve ve chu kan kai a, kan kal bek bek a—thlànmual panna lamlianah chuan.

Street light ëngin min chhun tawh lohna kawng kawi kan kal lai chuan, ‘Joey, Lenny, Cleo, Leo … hehe … in-rhym fuh fú ni,’ a ti leh a.

‘Nia,’ ka ti ringawt!

‘Ah … St. Luke’s Higher Secondary School-ah sâwn English literature ka zirtír ve a. Engtikah nge MA i zawh dáwn?’ a rawn ti chhuak leh a.

He nula hi zei ka ti, fel pawh ka ti. Ka tawngkam thiam lohzia leh ka tawng tam lohzia a hre tawh em ni le? A nih loh vëka leh, hmeichhe lama ka zei lohzia chu, hei a hre mék tal ang.

‘IIIrd Sem ka zo ve têp. IVth Sem chu nakkum lamah ka zo ang.’

‘Min zâwt lo nâ a, ka hming pum chu Hmangaihzêli a nia…’

A ngawi zui daih. A va pawi!

‘Nichin khán Cleo i inti emaw ni … sia…’

Ka va huai tawh! Mahni thuin ka tawng ngam ve!

‘Nia. Ka Sâp hming ve a nia. Ka pian tirh chuan Cleopatra tih an sa a. Mahse, Adhaar card kan siam dáwn khán Cleo tiin ka thlâk daih! Ka pa a sa denn!’ A nui leh her her a—nizàna a rûk deuha ngaihnawm ka tih deuh ang khán.

‘Engati … ?’

‘A! Chi nâng a! Cleopatra te chu mite rilruah an hmel tha dáwn denn ta maw … anni ang te chu kan ni ve lo chiang mai sia(h)!’

‘I nih leh nih loh pawh kei chuan ka hre chuang lo a … mask i vuah reng sia…’ ka ti ngam tawh! Ka va huai tak zet tawh êm!

‘Chu, min la hmu lo i tihna?’

‘Ni mai ang chu.’

‘Min hmu zing tawh khawp ang. Biak inah pawh…’

A lam ka hawi phei a. A nui ver ver a. Hrehawm a ti lo a ni ang. A huat pawh min haw lo a ni ang.

‘Chu pawh ka hriat loh chu… Han phelh teh.’

‘Bei zahthlâk êm mai a! Nakinah, Hmáwng hnuaiah.’

Lamlian pakhata thlarau pahnih

Kan kal bek bek a. Kawng chu tawi dáwn riauin ka hre tlat a. Kan uite chu thian hlui in­chhar ang maiin inzui pahin an inchhaih sek a. Dik tak chuan, ui neitu pakhat zâwk hian Leo leh Lenny te chu a thîk—hlim bîk a ti—zêp loah chuan!

‘Ih … mak i ti em? Ka rawn message che kha. IG-ah i hming leh i ui hming ka hmu a … ah … i location nèn. I number chu … K|P Matthaia group Secretary number neih te chu … har lo e…’ tiin kan inkár boruak reh vung vung chu a rawn ti reh a.

Ka nui ringawt. He nu hian min hria! Becca nèn min hmu tawh … ang em? Becca vànga ka natzia te kha a hria ang em le? Ka hre lo le.

‘A mak e!’ a ti leh a.

‘Eng chu?’

‘Thlànmual kawng reh raihah mi pa­hnih—zan tin… Kan normal lo a ni ang!’

He nu hian eng maw a sawi a! “Kan normal loh thu” maw!?

‘Engati nge kan normal loh ang?’ Mak tih hmèl zetin ka ti a. A lam ka hawi a.

Ka dìl pawh ni miah loin a mask chu a phelh ta—Hmáwng awmna pawh kan la thleng si lo a!

A hmél chu! A thatzia sawi thiam ka va’n châk tak! Cleopatra hmél dik tak chu ka hmu ve ta!

Ni e, a sawi dik. Mi pangngai kan ni tlat lo aläwm. He lam-lianah hian mi pakhat—mi pasal neih tùr vànga na tuar ve ’ngawt thlarau hian Cleopatra thlarau a kalpui mék a. Chûng thlarau pahnihte chuan he thlànmual panna lamlianah hian khawvêl thar din tùrin an uiten an ko chhuak a nih hi!

Mask a phelh rual chuan a lam ka hawi phei a. Mak ti zetin, ‘Cleo … patra … dik tak!’ ka ti chhuak hlawl mai—sawi ka tum loh ka sawi chhuak tih pawh ka inhre lo a ni ang!

‘Joey! Sual tha sia maw…’ zah hmèl–nui tet tet-in min ti.

Ka va’n duh tak—a tawngkam chu! Tùnlai keini thalaiho tawngkam tak hi chu aw … Cleo tawngkam hman chu a dik lo tih hre mah ila a mawina lai ka man tlat! Cleo sawi chhuah ni lo se mawi ka ti ang em, tih phei zawng ka hre chuang lo a!

‘Kan normal lo ka tih awmzia chu maw … a chhan min zâwt zui suh aw…’ 

Ka lu ka bu nghut a.

‘I chhúng ril a hlim lo a … kei pawh!’ a ti ta!

Hmáwng küng dinna, Leo nèna kan chawlh thinna hmun chu kan lo thleng reng tawh a…