Tlangvál chhe lo Cristiano luck-zia; a luck êm avànga nula chhe lo hlang láwr thei a nih thu kan sawi hmain, nula laka a luck viau hma, Manchester United a pan dáwn lai chanchin kan sawi hmasa lawk ang.

Man. Utd player-te bum kualtu naupang

August 6, 2003-a ni. Sporting Lisbon mual thar, “Estádio José Alvalade” hawn lawm nán, Pre-season Friendly Match khelhpuiah Lisbon chuan Manchester United an sáwm a. He inkhèlah hian Sporting Lisbon player, naupang kum 18 mi lek chuan Manchester United players, fans leh United boss Alex Fergusson-a mit a tlung nghâl hliah hliah! 

Lisbon naupang ball pét thiam Ronaldo chuan, Manchester United player tha leh lär rual— Ryan Giggs te, John O'Shea te, Nikki But te kha inthlahrunna nei map loin a lo bum kual hrep mai! United defender tha, John O'Shea kha Ronaldo véngtu ber a ni a. Heti hian a pu Sir Alex-a hnênah a sawi: ‘He naupang hi kan lei ngei ngei a ngai,’ tiin.

O'Shea khân a pú hnênah khán khatia ti lo thei a ni lo tih a thianpa Rio Ferdinand-a thu sawi hian a ti chiang—‘Ronaldo che vêl véng bertu, John O'Shea kha half time break-ah chuan a rawn thaw hlawi hlawi a; khawvêl boruak hi kham lo a ang ber! Oxygen tank a mamawh hial!’

Ryan Giggs paw’n, ‘Ronaldo-a’n ball a khawih a, O'Shea-a tih ngaihna hre lo lutuk kha kan lo nui tet tet! O'Shea lu ná (migraine) a chhuak lo chauh!’ a ti. ‘Chawlhlâwk lai phei chuan John kha khawsik nei ang maiin a hmui a ro hulh thei nia!’ tiin player dang paw’n an sawi ve bawk.

Inkhelh bànah Man Utd kha 3–1 in chak mah se, ngam loh player pakhat an nei. An player pawimawh rualin, an pu Alex-a hnênah, ‘Kha nau kha kan lei hma chuan, he ram atang hian kan häw lo ang!’ te an tia! Stadium an chhuahsan hnu paw’n an pu Alex-a chu bus-ah an nghâk thap. A rawn thleng thei rëng rëng si lo! Ani pui roh chuan Lisbon hotute hnênah Cristiano lei dàn ngaihtuahin a lo buai hle chu lo niin! 

An inkhelh atangin ni ruk a liam a. Manchester United player leh Alex-a mi awh ber, Cristiano Ronaldo chuan Old Trafford a pan mai! Chuta tang chuan, làr leh hmingthanna, hmasàwnna, hlawhtlinna, player “man to” mai pawh ni lo, nula lama “man to” nihna a chang chho tan ta a ni.

Cristiano kawppui hluite:

• Jordana Jardel (2003): Sporting-a a khelh laia an captain, Brazilian fotballer hmingthang, Mario Jardel-a farnu, model hlui Jordana Jardel nèn, kum 2003–2004 chhúng khán Ronaldo hi an inzui a; “Ronaldo bialnu hmasa ber” an tih chu a ni. Kum 18 mi lek a la ni. A “tawih” hmasa ber a nih vàngin lâk pawh a la thutak viau a ni àwm e.

• Merche Romero (2005–2006): Kum 2005 kum a ni a. Ronaldo chu Manchester khua chhuahsanin chawlh hmangin a zin thawléng a. Chu a zinna hmun chu Madeira bula thliarkar te tak të Porto Santo-ah a ni. Heta a zin tum hian tawnsabawp a tawng te pawh ti ila a dik ang. A hnam pui, TV presenter leh model lâr tak, Merche Romero nèn an intawng nawlh. “Love at first sight” awihtu zíngah an tel ve ta! 

An khatih lai khán Ronaldo kha kum 20 mi a ni a; Merche erawh kum 30 mi. Khawvêl hriat­ah an inngaihzàwn thu hi thup an tum ve viau. Mahse, inhmuh (in-date) an tum tum pawh tu mah hrilh loh an tiam. Mahse, paparazzi-te’n beach-a a intàwl hlim lai thlalâk chu Portugal chanchinbu-ah a chhuak ta chuai mai si! Khawvêl hriatah an thang chhuak ta a ni.

• Gemma Atkinson (2007): Pu Alex-a’n inkhèl tùrin inkhuahkhirhna khirh tak siam fo mah se, nulaho lakah erawh a khuahkhirh séng bîk lo a ni ang—khawvêla footbaler lär ber ni tan mék chuan, British model, TV personality leh actress lär ni bawk, Gemma Aikinson a’n kawp ve leh a. Chanchinbu lamah pawh an chanchin a thang viau—mi hmingthang ve ve na nâ nâ chu! Thla li chhúng an inkawp hnuah October 2007-ah an inthen.

He nu hi a tawng duh ve viau! Khatia an inthen hnu khán, media hmaah tawng nuam a ti zêk! ‘Cristiano chanchin chhe lam sawi tùrin chanchinbu miten pawisaa min tham an tum fo. Mahse, ka ti ngai lo,’ tiin.

• Irina Shayk (2010–2015): He nu chanchin hi ka sawi châk—chhe lo ka ti êm mai! Ronaldo bialnu zinga lär ber pakhat a ni. Russian model leh actress a ni a; Ronaldo vàng pawha lär zui ta hluai pawh a ni. Kum nga zet an inzui; than pawh an thang na hle—red carpet thlengin. An inthen dàn hi sawi dàn a tam a; mahse, a ber chu Ronaldo nu a ni—a fapa bialnu hi “a ei” tlat lo! 

Sawi thui deuh ang. Thu dik ber anga ngaih chu kum 2014 kum tàwp lam khán Maria Dolores Aveiro, kum 60-na birthday surprise party siam chu Ronaldo chuan a tumruh hle. Mahse, hetih laia a “tawih” Irina hian a bialpa nu birthday party-a tel chu a duh tlat lo!

Hei vàng hian Ronaldo nèn pawh an inhau hrep! Kum hlui thlah zàn pawh hmang dùn loin an inthen zui vang vang! Maria Dolores-i hian Irina hi an ina lawi atán a duh viau lo a, a “ei” viau lo nia sawi chenin thu a thang.

Ve zuaiho!

• Nereida Gallardo: Man Utd.-a a khelh lai, kum 2008 khán, Ronaldo hian Spanish mi, model leh socialite Nereida Gallardo a kawp ve zuai. Mallorca thliarkara an léng dùn lai pawh paparazzi ten an phâwk fo. Hemi kum January atanga July/August emaw vêl thleng an inzui. An inthen chhan ber nia an mite sawi chu: Nereida hian Real Madrid star, Sergio Ramos nèn an lo inhmu fo tih Ronaldo-a’n a hriat vàng a ni.

• Paris Hilton: Kum 2009-a Cristiano-a’n Real Madrid a pan hlim khán chawlh hmangin Los Angeles a pan a. Zan lamah socialite Paris nèn hian “MyHouse nightclub”-ah an intawng. Hetah hian paparazzi hmaah an lo hlim dùn hle. Paris-i ú (Nicky Hilton) in lamah pawh an inzui phei. A tûk zànah pawh an inhmu leh. Mahse, an inkawp rei lo—an inkár hlat vàng (LA – Madrid) niin Ronaldo chuan a sawi.

A kawppui nghet, Georgina Rodríguez

A tìr lama kan sawi—vawiin thlenga Cristiano kawppui la ni ta reng, fa pawh hrinsaktu Georgina Rodríguez pian leh mùrna leh a sei len dàn chu kan sawi nawn tawh lo ang.

Kan la sawi loh atangin tan ang. Spain rama a sei len lai khán, Georgina hian kawppui “chhe lo leh lär tak” a la nei ang tih a inring ngai lo—an chhúngkaw din hmun a harsa êm mai! Mahse, fashion line lian ber bertena an sàwm rak rak khawpa nula “rak” leh “tawih” erawh a ni ve chiang mai!

Kum 2016 June thla a ni a. Georgina chu Madrid-a Gucii dàwrah sales assistant hna a thawk mék. Chuta Ronaldo léng lût nèn chuan an mit leh an thinlung a intawng rual! A rualin an lung a phu nasa ve ve ang! Hun rei lo te hnuah, ‘Love at first sight a ni mai e,’ an ti ve ve.

A hnu lawk (tak tak)-ah, Dolce & Gabbana event-ah an inhmu leh a; an ni tan dèr! Inzêp leh inthup an tum ve ngar ngar. Shades leh hmaikáwr te pawh an hmang nasa. Chutiang chuan Disneyland, Paris te pawh an thleng ve. 

Mahse, chutianga inthup reng chu Georgina tán chuan thil hahthlâk a tling. A thawhna Gucci dàwr kawtah thlalatute leh Ronaldo fan-te pung tuau tuau reng mai chu tawrh zawh rual a ni ta lo thuai a; Gucci-a a hna pawh a bansan ta tawp mai!

Mahse, Ronaldo chuan a hmangaih tán chuan that chhuahin, Madrid-ah a bialnu tán dàwr nghah tùr a zawnsak leh ngat. Dàwr lian leh lär, Prada-ah a thawk zui a. Mahse, a thawk rei lo—fans leh paparazzi-ho vàng bawk!

January 2017 a ni. Zurich khawpuiah FIFA Football Awards sem a ni. Chutah chuan Rnaldo chuan a bialnu Georgina, a nu leh a fapa, Ronaldo Jr (tu laka a fa nge puan zàr a ni lo) te chu amah tawiawm tùrin a hruai a. Hei hi, mipui hmaa a bialnu Georgina Rodriguez nèna an inlan hmasak ber tum a ni.

Innei si loin fa!

June 17, 2010 khán San Diego, USA-ah Ronaldo fapa hmasa ber Ronaldo Jr. hi a piang a. A nu hi tu nge a nih thup tlat a ni. June 2017-ah surrgate (nau pai tùr bîk a nu thlan sa; a nu nihna thup tlat) phìr mipa leh hmeichhia—Eva Maria leh Mateo Ronaldo a nei leh. Georgina nèn an inzui hnu, November 12, 2017-ah fa, Alana Martina an nei ta a. April 2022-ah Angel leh Bella Esmeralda an nei leh. A pian hlimin Angel hi a boral hlauh. Georgina hian Ronaldo-a fate dang zawng zawng hi ama fa dik tak angin a enkawl vek a ni.

Engtia an la inneih si loh?

Mi tam tak zawhna chu, “Engati nge hei chen chen inzui tawh si, an inneih loh?” tih hi a ni. An la inneih “kher lohna chhan”-ah hian kan lo buai ve êm êm hlawm a! An la inneih loh chhan a awm a ni ang chu—kan hriat ve tül kher lo thil te pawh a awm ve ang a! Ronaldo nu la dam vàng a nih ring páwlten thu an theh darh chiam chiam a! Kan hah­thlâk hlawm teh e!

Interview tam tak hma chhawn tawh Ronaldo chuan, ‘Eng tik niah emaw kan inneih ni chu a la thleng khawp ang. Inneih hi ka nu duhthusàm a ni. “Ka mo tùr dik tak a ni,” a ti aläwm,’ a tihte hi khu lam chanchinbute khuan ringin pawm ve mai se; tin, keiniho pawh hian.

Georgina thu sawi hi hre bawk ila… ‘Hmeichhe dang ang bawkin inneih hi chu ka châk ve aläwm. Mahse, tûnah hian, Pathian malsàwmna tam tak ka dawng a, hei hi inneih­na aiin hlu ka ti rih,’ a tih mai hi.

A nu hmangaihtu

Ronaldo hian a nu hi a zah a, a ngai pawimawh a, a dah thu ber—a nunah! ‘Ka nu hi chu ka chakna hnár a ni a, ka tán chuan ka engkim a ni,’ a ti thlâwt. Kum 2015-a tih chhuah Ronaldo documentary-ah khán a nu’n Sporting Lisbon-a khèl tùra a thlah liam laia a thu sawi a sawi chhäwng a: ‘Ka nu vàng liau liaua he din mun hi thleng thei ka ni,’ tih thu hi.

A nu hi natna khirh tak—stroke leh cancer dam chhuak tawh a ni. Ronaldo hian a ngaihtuah êm êm a; a inkhelhna apiangah a zui zêl. A nu hmuha inkhelh kha a duh ber a. A nu hmuh phâka ball pêt kha nuam a ti ber.

Eng nge maw, kan nute tán hian ka nih ve chiah le? Sum leh paia buai lo “nasa” Ronaldo hi kan tluk zo chiah ang êm le?