Kan hriat theuh angin CYMA, UD&PA Department leh AMC tangkawp thukhawm ‘Coordination Committee for Municipal Solid Waste Management in Aizawl’ chuan March ni 31, 2025 khan Aizawl khawpui chhungah Faina Hnatlangpui a koh a, Aizawl Khawpui chhung Branch YMA 90 chuangin he ni pual hian mahni vêng chhûngah theuh hnatlangpui an kalpui a, kawng kam, luikawr leh vantlang zuninte bâkah vêng chhûnga hmun tawp hnawk leh bâl zual laite tih fai a ni. Faina kan nunpui leh nunpui loh chu Hnatlangpui hial koh a nih atang hian Faina kawnga hma kan sawn loh zia leh kan rilru put thlak a tul zia a ti lang chiang hle. 

Fai tura pawimawh hmasa ber chu fai duhna rilru put hmasak tlatna hi a ni. He rilru hi miin a put miau chuan, a in chhung, a incheina leh a awmna apiang a fai mai thin. Hetiang ni lo a, kawra bawlhhlawh la paih ching kan nih chuan, eng ang pawhin inchei nalhin, lirthei tha leh smart phone te pawh hûm mah ila, mihring nun changkang tehna kawngah kan hlawhchham hle tho tihna a ni. A lang chin chauha fai, faina nunpui lêm si lo kan tam hle tih a chiang a, mipuite’n bawlhhlawh kan ngahzia leh a hmun ni lova bawlhhlawh paih mai mai kan la tam zia a lang. Faina hian kan hriselna thlengin a nghawng a, a paihna tur ni lo a, bawlhhlawh paih kan tam chhung chuan eng ang pawhin in ti changkang mah ila, kan luikawr en chuan kan zia tak tak a lang chhuak bawk si. 

Mi nawlpui hian faina hi kan nunpui lêm lo tih a hriat a, tawih thei leh tawih theilo thliarna kawngah hma kan sawn lo hle tih a hriat a, faina hi a takin inchhung khur atangin kan zawm a ngai ta hle a ni. Sawrkar ruahman angin tawih thei leh tawih thei lo pawh mahni inah thliar a, a paih hunah tha tak paih mai tur a ni a, thil har a awm lo. Hetih lai hian, kawra bawlh­hlawh la paih duh kan la awm ve reng a, pawi tak a ni. Kawra bawlhhlawh kan paih hian, kan tui tlan Tlawng lui a titawp a, tui pump na kawngah harsatna a siam fo mai. 

Mahni inah bawlhhlawh thliar a, a hunbia paih hi thil har a ni lo. Amah erawh chu khawi ilo kan vah chhuahnaah bawlhhlawh a bawm a paih mai hi kan harsat tlâng ni berin a hriat. Mi hmuh laia paih ngam lo, mi hmuh loh hun chânga bawlhhlawh a paihna tur ni lo va paih kan awm thin te hi sim a va tha em. Mahni fihlim tum, midang­te mitmei venna chang hre lo, mahni chauh inngaihtuah mi kan nih chuan in enfiah a tul hle. A paihna tur ni lo va bawlhhlawh kan paih hian nakinah keimahni bawk harsatna kan insiam thin a ni tih hi kan hriat a va ngai em. 

Faina hi a taka kan nun pui a, naupanlai atanga inzirtirna neih hi a tha hle a, inchhung khur atangin i inzirtir zel ang u. Midangte zah ngai chunga nun hman hi kan tum tur a ni a, ka bawlhhlawh paih hian midang tan hnawk a siam ang em? tih rilru put fo a tul hle a ni. Mi mut reh tawh hnua bawlhhlawh luikawr emaw kham a paih mai ching kan awm nual tih a chiang a, heng mi te hian ram dan nasa takin an bawhchhia a, mahni chauh in ngaihtuah, an fihlimna ringawt ngaihtuah mahni hmasial an ni. Heng mite avang hian kan ramin hmasawnna lamtluang a zawh thei lo chu a nih ber hi. Hetiang ang rilru pu kan la tam tih a hriat a, khua leh tui tha an ni thei lo. Bawlhhlawh a bawm a paih mai hi harsa kan tih chhung chuan hmasawn a va har dâwn lua em! 

Faina kawnga tan lâk zel hi kan tih makmawh a ni a, a taka nunpui hi thil har a ni lo, bawlh­hlawh a bawm a paih, a hunbia bawlhhlawh Motor-a paih leh luikawra paih loh hi kan nun pui a tul ta. Pawn lang chauh fai, chhungril nun fai si lo kan tam hle. Mi changkang ni tur chuan faina leh thianghlimna hi kan ngaih pawimawh a, a taka nunpui hi kan tih tur a ni. Midangte tih tur a dah mai lovin mahni in en ila, he hna­tlangpui hian a tha zawngin kan nunah rah tha chhuah mawlh se, kan zavaiin faina kawng i zawh zel ang u.