Lemchan khawvêla chawimawina sáng bera ngaih, Academy Awards (Oscars) dawn chu sawi loh, a dawng thei tùra hming chhawp chhuah nih ringawt pawh hi thil namai a ni lo—Shah Rukh Khan-a hming meuh pawh lam chhuah a la ni lo! Lemchan thiam pawh ni lo tána Oscars dawng thei tùra hming chhawp chhuah nih phei chu thil ropui tàwpkhâwk a tling ngei ang! Kan sawi tùr hla phuah thiam hmingthang Diane Warren meuh paw’n Oscars êm hi chu a la hüm häw thei bîk lo a; mahse, kum 2022-a “Academy Honorary Award” hlan tawh Warren-i hming hi, tum 16 zet mai Oscars dawng thei tùra chhawp chhuah (nominate) a ni tawh thung! A zin kawng erawh a mám pur hauh lo!

Naupang riang thìn chu

Rock band lär, Aerosmith-ho hla hit, love song ropui, “I Don’t Wanna Miss A Thing” te, LeAnn Rimes leh Trisha Yearwood tena an hit, “How Do I Live” te, Faith Hill sak, “There You’ll Be” te, “Un-Break My Heart” (Toni Braxton), “Nothing's Gonna Stop Us Now” (Starship), “When I See You Smile” (Bad English) te … i sawi hlui mah mah a? A nih leh, Lady Gaga, “Til It Happens To You” te, Taylor Swift-i “Say Don't Go” te, Becky G hla, “Flamin' Hot” te pawh i hria a nih chuan, a phuahtu chu mi pakhat, Diane Warren vek a ni e. Kum 2019 atang khán—kumin tih loh—Oscars semna inkhâwmah, kum tin Diane Warren-i hlate hi sak an ni vek asin!

Heti khawpa hla phuah thiam leh hmingthang hi, a tìrin hetianga ropui sa hi a ni hauh lo. Juda mi an nih avànga en hranna te pawh an chhúngkuain an tâwk ve thìn. Diane-i pa David chuan an hnam hming “Wolfberg”  tih chu, “Warren” tiin a thlâk daih—“A Juda hming lo deuh zâwk ang,” a tih vàngin! Chu vàng te pawh chu a ni ngei ang, a naupan laiin Diane hian rilru lama harsatna eng eng emaw a nei thìn a: mi dang laka inngaih hran tlatna leh rual pàwl peih lohnate a nei nasa thìn hle.

Diane Warren hi unau hmeichhe pathum zínga a naupang ber niin a naupan zual lai chuan a luhlul ve hle thìn niin amah ngei hian a sawi a. A tleiräwl chhuak hlim hlawl paw’n in atanga chhuakin a rawl bo zet a; mahse, an zawhte a ngaih êm avàngin a häw leh!

Naupang të a nih laia a radio ngaithlâk nasatna chuan radio-a “aw thun” ve châkna lian tak a neihtír a. A chhúngte rimawi tum leh sak thinte paw’n rimawi tuinaah an vulh nasa hle. Kum 11 a tlinin hla a phuah tan dèr tawh a; kum 14 a tlin meuh chuan, rimawi chu “Ka nun chhan chhuaktu,” a ti thei hial tawh!

A nu, Flora Warren thung chuan, chutia an fanu të ber tawm chet chet leh rimawi ringawt thupui mai chu a ngaithei thak lo! Chuta kárah, Diane-i rimawi zirtírtu lah chuan, ‘Rimawi khawvêlah a tán dam khaw chhuah ngaihna a awm lo ang!’ a lo ti ve sek bawk si a! Flora chuan a fanu chu tha taka lehkha zir chhoa sorkar pisaa hna thawk tùrin a duh tlat a. Diane-i hnênah chuan a tum ber leh a châk êm êm, hla phuah thiam nih chu bànsana chutiang nih chu tum tawh hlek lo tùrin vawi tam tak a hrilh thìn.

“For all those times you stood by me…”

Chutia a nu berin a tum leh nih châk ber bànsan tùra a tih lai, rilru hrehawm taka a awm thin lai chuan a pa erawh chuan a fanu chu a tuina leh a tum ram ûma tlän zêl tùrin a fuih tlat thung a. A nupui remtih leh remtih loh lam ngaihtuah miah loin a fanu chu hrui 12 nei tingtang a leisak hial a. Zai intihsiakna hma chhawn tùra a hruai tùr thu a hrilh bawk.

A hun harsa berah a pa chuan a däwm tlat thìn a. A nuna beidawnna chhümpui a dur khup laiin a pa chuan hlimna káwl a èntír thìn. Amaha fel lo awm fo siam tha tùrin a pa chu a chak tâwk reng a; a tum ram thleng tùra kawng kawh hmuhtu pawh a ni. A paah chuan hmangaihna zawng zawng hi kim vekin a hria a. Ani chuan a chawi sáng a; harsatna kára “a vawiin” hruai thlengtu chu amah a ni tih a hre reng a. A pa hmangaihna chu, a lo puitlin hnu leh a tum ram a thlen hnu thleng paw’n a theihnghilh thei rëng rëng lo. Kum 1996-a “Up Close and Personal” film Original Sound Track atána an hman tâk, Celine Dion-i sak, “Because You Loved Me” hla ngei mai kha—a pa hmangaihna a chhàn lêt ve nán leh, làwm thu a sawi lêt nán a phuah chhuak ta a nih kha!

Heti hian a tih kha— “For all those times you stood by me / For all the truth that you made me see / For all the joy you brought to my life / For all the wrong that you made right / For every dream you made come true / For all the love I found in you / I'll be forever thankful, / You're the one who held me up / Never let me fall / You're the one who saw me through, through it all…”

Dí tawng lo nula—hmangaihna hla phuahtu chu!

Mak ka tih fo chu: a hla phuah ngaithlatuten a hla thu kan mil theih zêl khawpa love song phuah thiam, kum 69 mi, nula Diane Warren hian ngaihzáwng a la nei ngai miah lo hi a ni! Zai thiam leh band heti zozai hian a hla—hmangaihna hla lungkuai tak tak; inthenna hla lungrun ber ber leh inngaih vawng vawngna lam hla thu ril tak tak phuah thìn Nl. Diane-i la nulât rengna chhan hi khawvêlin hriat a châk. Ama sawi ngei hi i’n chhiar teh ang:

‘Ka hla ang hi ka ni lo! A tak ramah chuan, hmangaihna lipuiah ka la chëng ve miah lo! Mi pangngai hi ka ang lo a—inngaihzàwnna lam hi ka thiam lam a ni ve lo. Lemchang ang mai ka ni—Juda ka nihna lan chhuahna pawh a ni mahnâ! Inngaihzàwnna lamah hi chuan mi kherkhiap tak ka nihna pawh a ni bawk ang chu! Mahse, hla phuah kawngah erawh ka ni chuang hauh si lo a,’ a ti.

Ama insawi ang hian “nu mak” tak chu a ni phawt a. Hollywood Hills-a a pisaah pawh tú ma luh a remti ngai lo! Kum 2012 khan a pisa chu, “kum 17 chhúng eng mah rem fel awm miah loa hnawk nuai,” angin a sawi! Tin, amah hi puithùna âtthlâk ring mi a nih avàngin a pisaa a pindan chu, “a rûka khawvêl hran” angah a ngai bawk! A pindana tape recorder-ah a hla phuahte chu a record teuh thìn a; a ngaithla nawn tlut tlut thìn a; tha a tih ber a thlang kual thìn.

Nula entawn tlâk

Style hrang hrang—pop, R&B, rock, country, latin, jazz hmangtea hla phuah thìn Warren-i hian, a hla phuah tawh zínga “hla tha ber (master-piece)” phuah tawhah a inngai ngai lo. A chhan nia a sawi chu—a hla phuah zínga “a tha ber” tia sawi tùr phuah a la duh tlat vàng a ni.

Hei hi mi tinin kan hna thawh leh kan thil tiha kan zir tùr pawimawh tak pawh niin a lang. Chàwl loa rim taka kan thawh belh zêl chuan, kan kut chhuak tha ber chu lo thleng mai tùr lah ni!

Tin, Warren-i hian rimawi tumna hmanrua eng mah bel taka thiam a nei lo bawk! A thiam bel êm êm chu hla phuah a ni mai! Chutah chuan a insáwrbing mai a; rimawi khawvêla hla phuahtu ropui ber zínga mi a ni thei. Thiam loh thiam tuma hun leh tha sèn buaia thil dang tih làwr chiam a tum ve lo a nih chu. A thiam a hre chiang a; chutah chuan a rilru a séng mai a; chu chu zai thiam tam takten malsàwmna an channa hnár a lo ni mai zâwk a ni. Chu lo lehah, mi maktaduai tam tak thinlung hnehtu a ni daih bawk a!

Hla phuah thiam zíngah Diane Warren aia thawkrim hi an váng ngawt ang! Kár khata ni sarih chhúnga ni sarihah, ni tin dárkar 16 chhúng hla phuah nán hun zu hmang thìn a! Hla phuah hi a tuinaah a ngai satliah lo a, a ei zawnna a ni tih a hre chiang hle. A rau “lan hun”-ah pawh, a “lan loh hun”-ah pawh—ni tin dárkar 16 hla phuah nán hun a séng peih. Tih tam na nâ nâ chuan thil tha chu a lo chhuak mai thìn tih a hre chiang hle.

Tum khat pawh nula Diane-i hian a inah party a huaihawt a. A lo thleng apiang chu hlim takin a lo làwmin mi lär (celebrities) thahnem tak lo kalte nèn chuan hun hlimawm tak an hmang a. Mahse, dárkar rei lo te hnuah chuan a khualchhawn ber chu a bo daih! A hnu fé-ah pindan pakhat atang hian a rawn chhuak hlawl mai a. Enga ti chen chen nge chutia a bo daihna chhan chu an zâwt a. Nl. Diane-i chuan, ‘Hla ka phuah lawk aläwm maw le!’ zu han ti a!

Mahni hna rim taka thawka, tui chilha, ât phah lek lek hialtute chu, “thil tha” hian a hmuak lo thei lo a lo ni.

Min hmangaih vàng a ni!

Han lêt leh lawk ila—a tih tàwp nán: Warren-i’n a hun harsa ber laia amah chelha däwm känga chawi sángtu; a nu’n a khap beh chung pawha a pa fuih tàng tângna avànga Academy Honorary Award, Grammy Award, Emmy Award, Golden Globe Awards tum hnih leh, a záwna kum thum chhúng (1997–1999) Billboard Music Awards for Songwriter of the Year a dawn theihna chhan—a pa hmangaihna a hriat chianzia a puan chhuahna hla hi ropui ka ti tàwp thei lo. 

Kum 1996-a Celine Dion album, “Fallin' Into You” ka leina chhan pawh kha, he hla—“Because You Loved Me” a awm vàng a nihzia pawh ka hre chhuak uai uai mai. He hla kher hi chu, love song atána a phuah pawh lo ni se, a dawngtu tán chuan hei aia hla duhawm leh ngaihthlâk nuam tùr hla hi a váng ve ngawtin ka ring! A thunawn hian i’n khär mai teh ang—a tlar “by” tlara han sawi belh ka la châk tehrëng nèn…

You were my strength when I was weak
You were my voice when I couldn’t speak
You were my eyes when I couldn’t see
You saw the best there was in me
Lifted me up when I couldn’t reach
You gave me faith ’cause you believed
I’m everything I am
Because you loved me…