“Hla thu (lyrics) lâk” ka tih hi, tùn hmaa Song Book-a chuang tùr, tape recorder ngaithla paha a hla thu kan hriat dàn ang anga kan ziah thlâk thin ang kha a ni mai a.

Kan thu hmasa, “Cassette Record leh Buaina Tinréng” chhiartute tán chuan K’u Muana hi mi thar a ni lo ang. Ani hi ka thil hriat loh, ka hriat duh apiang min hrilh zêltu—tûnlai chu ni se, “Ka Google”, “Ka AI/ka ChatGPT/ka Gemini” ka tih tùr ang a ni. Ani hi mi thiam—páwl kaw zirlai a ni, ka tih tawh kha.

TDK emaw, Sony cassette ruak emaw kan neih tâk si loh avànga Lalchawimawii zai zawng zawng Guns N’ Roses kan record hnan hnu khán G N’ R hla thu hriat chian lehzual châkin ka tui häl zui a. Song Book-a an hla thu ziah chhuah mai pawh ka duh tâwk lo; a hla thu awmzia hriat châkin, Sakhi lui te tui châk thaw huam huam aia nasain ka thinlung hi a tui häl a ni.

“Nak Nak” hla thu kan la e!

K’u Muana nèn chuan kan National Panasonic tape ká chu kan han àntír leh a. A ka áng huau chhúngah chuan Lalchawimawii cassette ni si, Lalchawimawii zai rëng rëng awm si lohna, G N’ R zai hlïr awmna chu kan han thun leh a. “Play” tih chu hmetin kan han “pe-lei” (play) leh ta a. A va han nuam veng veng thìn tak êm!

K’u Muana chu a Mikado eksawrsaish buk (exercise book) leh a pen tui rim tui nèn a inring ràn mai. “Nak Nak” hla (“Knockin on Heaven’s Door” kan sawi thin dàn) chu a forward chhuak ta! (He hla hi G N’ R album kan record, “Use Your Illusion”-ah chuan a awm lo a; cassette Side B tàwp la àwlah U Jimmy-a kan record chawptír leh a ni.)

A tìr atang rëngin a fuh—Ekgel-a (Axl Rose)-a rawn “Û” (Oooh) dàn atang ringawt pawh chuan. Silash-a (Slash) tingtang “pa-la-king” (plugins) lah a mawi narawh. Kei chuan, ‘K’u Muan, engati nge Ekgel-a hian a zai hma hian a ú a koh hmasak phawt zêl a?’ ka lo ti pek.

Tape chu a “Pauch” (Pause) a. ‘Zir-mâwl! Lo ngawi rawh. A hla thu ka la thla dáwn. A ú a kohna pawh a ni bawk lo! Sâpho khuan, a bîkin California-a awmte khuan Sihal hi an ngai sáng a. A “ù” dàn hi an hlaah an telh fo. A bul tan nán an hmang nasa,’ tiin vìn zetin min chháng a. Ka fiah ta uar.

Hla thu chu le! 

A rawn zai ta! K’u Muana chuan a ngaithla vang vang a. A “Pauch” leh hnuah heti hian a ziak thla a:

“Mama, take the best for me.” (Mama take this batch from me)
A ziah zawh rualin a “pe-lei” leh; a ziak thla leh:
“Ra khen you sit anymore.” (I can’t use it anymore)

A “Pauch” leh. A rewind leh. Ngaihthlâk nawn pahin a hla sak leh a hla thu ziah chu a inmil em, tih “uluk-ly”-in a endik leh phawt. ‘Hmmm!’ tiin a bu nghat a. A dik ngei a ni ang.

Hrilhfiahna nèn

Keimah: K’u Muan, eng a sawi tumna nge? Sâpho hi, an nu leh pate hian an fapate hi “Máma” tiin an ko ve thìn tho em ni? Chuan, “Ra khen” a tih hi eng tihna nge ni ta ang?

K’u Muana: “Máma” tihte chu … hmang nasa e. An fapate koh duat nán, “Máma” an ti ve vek tho aläwm. Tin, “ual tâwr” (world tour) an nei nasa a; an zin kual nasa a. An fan-ten an ngaih sàn lehzual theih nán, an hla thuah hian an mahni ngai sángtu, hnam hrang hrang tawng an zep ziah thìn aläwm.

“Ra” tih hi Hindi a ni a, mak tihna, “Are!” tihna ang hi a ni. “Khen” a tih hi chu Mizo tawng a ni leh daih. 

Chuti chuan, he lai hla thu awmzia chu: “A thu hle hle lai—“you sit it” a tih hi maw—ka khen chawrh theih nán,” tihna a nih ber chu—a awmzia chu.

Keimah : Ka man chiah e.

Ani’n tape “pauch” lai chu a’n “pe-lei” lehnghâl a. Beng sika ulukin, chhíng diar diar chungin a ngaithla leh. Rewind-a a ngaithlâk nawn leh hnuah heti hian a ziak chhuak leh a:

“Kin da to da to say,”  tiin. (Its getting dark, too dark to see) A rewind leh. A hla thu ziah en pahin a ngaithla nawn leh ngat. ‘Hmmm,’ tiin a bu leh nghut; a la dik zêl a ni ang.

Keimah: Eng nge “Kin da, to da…” tih awmzia chu?

K’u Muana: “Kin” tih chu “Nakinah” tih lam tawi a ni. “To da” tih chu, “A dâk leh hunah”—a ni leh mai. Hemi tlar awmzia chu: “Sawi chhàwn leh tùr leh mi deu tùrin, nakinah a da leh ang” tihna a ni.

A “pauch” chu ti tàwpin, a “pe-lei” leh. Ngun zetin, a “sipikar” (speaker) bula a beng dawh meuhin a ngaithla leh.

“Ills lie ka nakin on heaven’s door”  tiin a ziak leh ta. (Feels like I’m knockin on heaven’s door). A awmzia ka zâwt leh. 

K’u Muana: He lai tlar hi chu a Pathian thu ta ruih mai! Thlarau atang lo chuan hriat fiah chî a ni lo ang! Thlarauin min hriattír ve dàn chuan: “Dam lo der angin lang mah ila, nakinah chuan vàn ram kawngkhàr— “heaven’s door” a tihah khian ka la dâk lût ve ang,” tihna a ni ber.

Keimah: Chu! Ekgel-a hi a lo piang thar reng a ni maw?

K’u Muana: Ngaithla zêl phawt ang.

A thunawn chu a ngaithla uluk lutuk hran lo. “Nak Nak” hla hi chu sikul tinah kan sa nasa a. Anni, High sikul kal chin phei chuan dik takin an sa tawh ang chù! “Pauch” pah zêl thoin, rewind tawh kher loin a ziak thla ta zat zat a:

“Nak nak, nakin on heaven’s door or hey, hey, hey hey
Nak nak, nakin on heaven’s door or hey, oooh
Nak nak, nakin on heaven’s door … Ooh, hey hey hey”

Keimah: A “Û” leh vakna chhan hi, an ngaih sàn Sihal hnênah hian nakina vàn ram kawngkhàra an la dah luh tùr thu an hrilh ve a ni ang maw?

K’u Muana: Umm! Ngaihthlâk chhunzawm ang. Cháng hnihna a ni tawh dáwn. Lo ngawi rawh!

Tape chu a’n “pe-lei” leh a. A hre fuh thei lo a ni ang; a rewind sek mai. A tàwpah, zawi tê-in, “Máma, i pú my guns not in ground”  (Mama, put my guns on the ground) a ti sup a. A ziak thla ta a.

K’u Muana: A fiah e, a fiah e. A cháng hnihnaah pawh a pú hian a silai hi leia nghat chawrh lo tùrin a fuih a ni.

A “pe-lei” leh. A ziak thla leh. “Ra khen su them anymore” (I can’t shoot them anymore)

Keimah: “Are!” tihna “Ra” chu a hmang leh tho a ni maw?

K’u Muana: Hmang leh ang chü! “Khen hrep pahin ka la su leh chawrh ang maw le!” a ti leh ngat a nih hi. A nghal ve khawp mai!

A “pauch” lai chu thlahin a “pe-lei” leh a. A rewind zing leh hle. Huai takin a ziak thla ngam tlat lo! Vawi nga vêl zet rewind-a a “pe-lei” leh thin hnu chuan a ziak thla ta: “The káwl black káwl is coming down” (That cold black cloud is coming down).

K’u Muana: (Indawn kun ngâih pahin) A va lungchhiatthlâk dáwn êm!

Keimah: Eng vàng ngawt chuan maw!?

K’u Muana: Vàn ram kawngkhàra dâk ve lo tùrho tán chuan vàn atang khian káwl phe ëng zawr zawr ang pawh ni lo, “Káwl phe dum vek—black káwl” a lo tla dáwn! Ni lo! A rawn tla satliah dáwn lo, a sùrin a rawn súr dáwn! “Nak Nak” hla hi a lo va han thlarau hla rem rem si ve le…

Keimah: Love song emaw ka lo tia!

K’u Muana: A nih loh hi! Thlarau thilpêk hla a nih hi!

Vàn “mipa angel” âw

A thunawn chu a ngaithla leh a—a ziah sa nèn a inan tho avàngin a ziak nawn tawh lo. A bâk chu Silash-a tingtang zút leh hriat hleih theih loha thu chham a ni tawh a. A la thla tawh lo.

A tàwp lama hriat har zeta mipa thu chham chu K’u Muana chuan, ‘Vàn mipa angelho thu chham a nih chu! Mihring tawnga hriat theih chî pawh a ni lo!’ a ti mai! A ziah pawh ziah chî-ah a ngai lo!

A tàwpah inchhìrna!

K’u Muana’n a Mikado eksawrsaish buk (exercise book)-a “Nak Nak” hla thu a ziah chu ka Song Book-ah ka ziak chhäwng ve leh nghâl a. Ka ziah mék lai chuan, “Nak Nak” hla thu ka neih vàng leh, a hla thu awmzia ka hriat chian êm avànga naktûk sikula thiante zínga ka insawi theih dàn tùr mawlh chu ka ngaihtuah a. “Lal Petera chuan min ngai sáng lêt ve tawh khawp ang!” tih chu ka rilrua lian ber a ni!

Mahse … mahse! Kan ziah zawh rual chuan a hla thu awmzia chu ka ngaihtuah chiang a; intihtheihna leh chapopui chî a nih lohzia ka hre chhuak a. Thlarau lam hla, vàn ram ngaih hla a nih daihziate ka ngaihtuah chhuak ta zêl a.

Rilru tawngtaina ka nei zui nghâl mawlh mawlh a—inchhìra ngaihdam dìlna nèn. A chhan chu, ka bialnu’n lehkha min rawn thawn ka chhàn lêtnaah khán, ‘ “Nak nak” hla thu khân ka hmangaihzia che chu a hril chiang ber ang. Lo ngaithla ve ngei ang che,’ te ka kha ka lo ti a! Ka inchhïr ta ngawih ngawih a…