Zawhna: Ka pu, nu kum 35 mi ka ni a, fa pahnih ka nei tawh a. Tunlai hian ka raiin ka hre silova, ka pum hi a puar deuh a, ka kawng hi a na vak zel a, enge a chhan ni ang? Ka period a mumal si a, natna dang a ni thei ang em? 
 - Saii Sailo, Zarkawt

Chhanna: I period a mumal tih i sawi avang hian i rai lo chu anih hmel phawt mai a. Fa pahnih i nei tawh a, invenna i hmang lo anih a, nupa nun in hmang tho anih chuan rai thei chu i ni ngei mai. Hmeichhia an rai hian an thi a hul thin ngei a, amaherawhchu thenkhat chu rai chung si hian thi nei zeuh zeuh an awm ve fo tho mai. I zun i test (pregnancy test) tawh em i sawi tel lova, rai thei anga inngaihna i neih vang ani em tih erawh a hriat mai loh.

Hmeichhia an lo rai hian kan sawi tak angin an thi a hul a, tin rai/naupai in a ken tel insawiselna dang, luak chhuak, pum nuam lo, tai/kawng kham te pawh an nei tel ve fo bawk a. Thi hul (period miss) han tih dawn a, tlem far, pad hren ngai tho ang te hi naupai thenkhat ah a awm ve thin avangin nau in pai leh pai loh hriat nan zun test leh ultrasound han tih theih chu a tha hle mai.

Engpawhnise, period mumal tho nia i sawi avang hian i rai lo ni ah ngai phawt ta ila. Pum puar deuh i sawi hi pum lam fel lo, indigestion emaw pumpui lawng (Gastritis) vang ani thei a. I ek lamah insawi­selna i nei tel em tih te hriat theih ni ta se. Tin, kawng kham/na vak tih i sawi tel a. I chhul lamah fel lo a awm a ni thei a, tin, i zunkawng lamah fel lo a awm a ni thei bawk. Chutiang avang chuan Urine Test (Routine Examination) tih a that hmel a, tin, Ultrasound pawh lo ti ngei thei la. Zunkawnga lungte awm te pawhin i insawiselna ang hi chu a siam ve thei bawk.

Kawng lam fel lo i nei te pawh ani leh thei bawk. Entirnan, nau zai chhuah thenkhat hi Spinal Anesthesia (hnungzang ruh a chiu chi) an pek avanga kawng nuam lo nei chhunzawm hi an awm ve thei bawk a. Nau puak vanga kawng fel lo te pawh an awm ve thei bawk. Chutiang anih vang chuan ruh lam thiam Ortho Doctor te pawh rawn a tul thei bawk ang.

Zun atanga nau pai leh pai loh test na (Pregnancy Test) hi a rintlak ang reng khawp mai a, an sawi dan chuan 99% hi a dik an ti a. 1% hi dik lohna chance a nei ve tihna anih chu. Thenkhat chu thi hul si, preg test ah pawh positive bawk, mahse ultrasound ah nau bawm awm chuang miah lo an awm ve leh zauh thin. Chuvangin preg test kan tih a, a lo positive anih pawhin ultrasound a confirm leh ngei hi a tha.