Zan rei, zan reh ruah súr

Zàn a ni. Zan rei tak a ni tawh. A thim mup mai. Khawlai pawh a reh thuap tawh. Ui tang bauh ri takngial pawh hriat tùr a awm tawh lo. Ri hriat tùr awm chhun chu, ruah súrin kawngpui sír tui luan kawr a hawrh rî chauh chu a ni—a khát tâwka têk tla ri leh dur thìn nèn chuan.

Hmeichhe lung chhe vànkai, insúm miah loa tap hluam hluam bianga mittui luang zur zur ang maiin ruah chu kawngpuiah chuan a luang dùl dûl a. Mi nan huh zawr hnêp a. Ka thawmhnaw hâk lai—ka kekawrtë chenin a huh thla vek tawh. Mahse, ka rilru ná—hliam tuara zawr hnêp chu, chu ruah súr chuan a nan huh zo ve lo a; ka chhúngril—thinrima so bawrh bawrh pawh chu a thelh dai zo hek lo! A khát tâwka káwl lo phe leh zawr zawr thìn chuan ka zawh lai kawngpui thim mup mai chu a rawn èn leh zawk thìn tak nâ a, ka nun thim mup mai chu a ti thim zual sauh niin ka hre zâwk.

Nichin mai, nichin tak tak—minute tlem të liam taa ka thil hmuh khân min ti ná a ni satliah lo a, mi nung hi min ti thi a ni! Inphatsanna leh inbumna azawnga a tuartu tána tawrh har ber chu ka mit ngei hian a hmu si a! Tàwpin tai nei loa ka hmangaih, ka nupui hual, Anna-i ngei mai chuan min kalsan a ni mai lo a, min phatsan a; ka tána angel thianghlim anga ka vawn thin chu, mi dang lakah bawlhhlawh takin a che bawrhbáng zo a; amah hmangaihtu hi min uirèsan zu nia le! Anna awm dàn leh a thil tih avàng chuan ka ná a; amah hmu leh tawh ngai lo tùr leh, a hmuh leh tawh ngai loh tùrin ka inthiar fihlïm ta a nih hi.

Hei leh chen ka lo hmangaih tawh leh hmangaihnaa ka nghah reng thin Anna chu, sawi lâwk lëm loin zanin tlai khán an khuaah ka va tlawh thut a. Kan inneih la rem lohna chhan ber, a zirna a zawh fel tlai a ni bawk a, tia phür taka va pan ka ni. A phùr ve ka rin êm avànga va thàwn tum ka ni ber a. Mahse, a lo khawsak dàn chuan na takin min tháwng lêt ta zâwk si a! Anna tán chuan tu nge maw ka lo nih chiah le? Ka inhre lo!

Hriat loh lamtluangah hriat loh nula

Ruah súr buan buan hnuaiah chuan ngawi rengin kawngpui chu ka zawh a. Ka hmaa kawng awm chhúng chu hma lam pana kal zêl tum ni berin ka inhria—nihliap emaw, rain coat emaw pawh tel lo chuan. Khawii nge ka thlen tawha, engtia rei nge ka kal tawh tih pawh ka inhre lo hial!

Chutiang zan rei leh zan reh, ruah súr hnuaiah chuan ka hnung lam atangin car pakhat hi a rawn tlän a. Chutah chuan a ni, kawngpui lai takah ka lo kal bauh bauh tih ka inhriat ve chauh ni. Kawng sír lam ka pan a.

Mak angreng takin, ka zâwn a rawn thlen chuan car chu a ding chawt mai. A chhúngah chuan a khalhtu, hmeichhe pakhat chauh ka zuk hmu thei. Ka en chiang leh; a ni chiah e, a khalhtu chauh a chuang—hmeichhe pakhat chauh chu.

Ka lam hnaih tukverh chu a rawn hawng a. Chutah chuan a ni, hmel tha chu ka hmuh tâk ni. Nichin maia káwl rawn phe zawr aia rang fé zâwkin ka thinlung chu, chu hmeichhe hmel tha chuan a rawn chhun de zawr a. A hmél lah káwl phe aia ëng zâwka ka hmuh lehzêl chu le!

‘Thianpa, khaw' nge i kal dáwn?’ min rawn ti.

‘Ah … ka hre … ih … ka hre bîk chiah lo!’ ka ti bah nuai.

‘Kan va inang dáwn ve. Hawh le…’ tih leh car kawngkhàr hawn chu a rual a. Ka lût ve ringawt!

‘I ná a ni maw?’

Min phurtu nu chu hmai chhanah chiang lehzualin ka en leh a. A hmél chu a lo tha tak zet. Chu aia fiaha sawi ngaihna chu ka hre lo!

Biak ka duh a; sawi tùr ka hre si lo! Ani paw’n min biak chu a duh ve a ni ang, min rawn melh leh zauh thìn tih ka hria. Ka melh lêt ve ngam tawh lo—duhin châk hle mah ila.

‘I ná a ni maw!?’ a rawn ti chhuak phawng mai! Ka chháng lo. Ka lu pawh ka bu nghut lo.

Nuih suk pahin, ‘Kan inan hmèl riau. I kalna tùr pawh i hre bîk si lo a,’ a ti zui leh.

Chü a nui hmél chu motor seat hma dárthlalang atang chuan ka hmu thei a. Nui reng se ka va’n ti tak—ka dampui chiang dáwn si a!

‘Nang? Khaw’ nge i thlen … dawn?’ Ka la khùr dur dur! Vâwt ka tih vànga khùr emaw min ti se ka va’n ti!

‘Ka hre bîk lo. Ih … kan tàwpna tùrah tàwp tawp mai ang aw…’ A nui leh nia! Ka nui ve. Amah erawh ka nuih lêt ngam lo—ka hma dárthlalanga “amah” takngial pawh chu!

Mahse, chu dárthlalang chuan “magic” a thiam a ni ang—chutah chuan vawi leh khatah kan mit leh mit a intawng zawr mai! |êk tla ang maia “thut” a ni a; káwl phë anga rang leh chiangin kan inen! |êk den anga ná-in thinlung a déng zawr bawk—a rîkna pawh thinlung chhúng rilah daih!

Kan mit leh mit chu intawng leh se … a tih ve tho chu ka ring. A duh ve hle pawh ka ring. Mahse, a ni leh tawh si lo! Ka hming takngial pawh min la zâwt lo. Ka nihna leh ka natna chhan emaw, ka awmna leh ka chanchin emaw … pakhat mah min la zâwt lo! Tin, kei paw’n.

Hmeltha-i nèn—zan khat

Kan ngawih reng hnu chuan, ‘Hotel pakhat ka hria asin—khaw daiah sáwn. Kan mut ve êm êm loh ten!’ a ti!

Ka chháng lo. Ka chháng ve ting anga, hotel-a riah ve duh lo anga insawi hnawkin ka insawi âwk palh reu reu ang tih mawlh ka hlau!

A hriat hotel-ah chuan kan lût a; a lo reh ruih mai. Khualchhawn lo muthlu lûp lûp chu kai thoin chabi a díl a.     Pindanah kan lût—khum pakhat chauh awmna pindanah chuan.

Chiang êm êmin Hmelthai hmél, a mit meng leh a pian, a áwmbáwr leh a hmui, a sam leh a … a ke lèr thleng chuan ka thlír ngam ta! Min nuih seih a. A mawi a ni! A mit meng leh a nui ringawt pawh hian thil tih theihna mak tak an neih ka ring hial! Billy Joel-a’n, “She can kill with a smile, She can wound with her eyes,” a tih ang mai kha a ni. A sam kir deuh chiat, huh deuh fuap te chuan ka chùl an thlahlel ngawih ngawiha hriatna zuk han nei hman ngawta maw le!

Kei aiin a sáng hret. Ka hriatna chhan maw? Kan kára min danga min dàltu nei loa hmui inchàra kan din dun vàng maw le! A mipa hi ka dâk hret zâwk a! Ka kawr huh zawr hnuang te chu min hlihsak. Min phelh zêl dáwn emaw ka tih laiin hrûkpuan fai tak an chhawp chu min pe a; ani chuan ngawi rengin bual in min pansan daih!

A lo chhuah leh hnu pawh chuan kan la inbe ta chuang lo a. Eng mah kan la sawi lo. |awngka ni loin mit mengin—huai taka inmelh chungin—thil tih hmangin thu kan sawi a; “thil” kan ti dùn tawh zâwk a ni.

A hming pawh ka hriat loh Hmelthai thil duh tak chu ka pe a; ka mamawh tak pawh min pe ve—a hming pawh ka hriat loh, Hmelthai ka tih nu chuan.

Ka chan chhun—lehkha them!

Zàn chu äm taka hman tum viau mah ila, kan intawn hun a tlai si a, kan äm rei thei lo—zànin min daih lo! Kan chhíng eih lo. Zíngah kan chhíng.

Ka harh hlawl. Hotel banga sana intár chu ka thil hmuh hmasak ber a ni—a tlai tawh hle tih min hrilhtu chu. Nichin maia ka síra mu kha va leh hawi ka tum a; a awm tawh lo! 

Ka mutna atangin Hmelthai chu ka zawng ruai a. Bual in kawngka chu páwn lamah a inkalh si. A sùlhnu leh a hnuhma hmuh tùr rëng a awm lo—a rim la chám chauh lo chu!

Ka tho hlawl a. Khum sír dawhkàna lehkha them, no-a indelh chuan ka mit a la nghâl zar mai. Ka ban nghâl. Lehkha sírah chuan ball pen, a chhìna inchhìn lo hi a lo let ngát bawk. Chu pen-a a ziah ni ngei tùr, Hmelthai hawrawp kawi niaia thu tawi të inziak chu ka chhiar ta a:

“Kei chu pangpár kuh-mùm, la pár chhuak tùr chauh ka ni; nang a chî. Huana léng dùnin thing tiak kan kui tawh kha. Kei hi min rawn zawng buai lul suh ang che aw… Ka hriat rengna luahtu erawh i ni reng tawh ang.”

Awm tawh lo Hmelthai tán chuan tu nge maw ka nih chiah le? Ka inhre thiam lo!

Tu nge ka nih ka inhria e!

Hun a liam a—ní leh thla, kum hial pawh. A thu ziah ang khán Hmelthai hriat rengnaah chuan ram ka la chang reng em tih chu hre hauh lo mah ila, a sawi tel loh—ka hriat rengnaah erawh, “a lal ram” hian kin ní rëng a nei thei lo a nih hi! Amah nèna kan intawn hnu khán, nula tam ka tawng ta; hmeichhe tam tak ka kawp leh tawh; mahse, amah ang rënga vei zui leh hriat reng ka nei zui ngai lo.

Kha zàn atang khán kum hnih a lo liam ta reng mai a. Ka hna atanga kai sángin ka pisa kainaah pawh pindan hrang ka chang ve tawh. Tum khat chu, kan peon chuan min hmu duh an awm thu leh ka pindana luhtír a rem leh rem loh min rawn zâwt a. Lo luhtír tùrin ka hrilh a.

Ka dawhkàna ka thil ziah lai ka bih ngut ngut lai chuan khuh kharh ri ka hria. Ka harh zawk! Chu khuh ri chu hmäna, zan reha têk ri ka hriat anga ring khán ka hre tlat a nih chu!

Ka hawi chhuak nghâl. Hmelthai kha ka hmu leh ta—nau pawm chungin!

Min nuih leh sen sen a tum lui a. A tap tuau bawk si! Làwm vàng nge lungngaih vànga tap a nih zâwk tih phei zawng ka hre hauh law…

Chutah, a mittui chu a’n hui pâwk a. A fapa pawm lai chu chhuata dintírin a rawn kai phei a. Hmäna a car dárthlalanga Hmelthai mit meng ka hmuh chian tluka chiangin—chu mipa naupang mit mengah chuan, keima mit meng ngei mai chu ka zuk hmu a…

A nu chuan, ‘Bawiha … “Â pa, i lo dam em?” ti rawh le…’ a ti a!

Chutah zet zawng, Hmelthai leh chu mipa naupang tán chuan, tu nge ka nih ka inhre chiang ta hle mai!

(Inspired by a song “All I Wanna Do Is Make Love To You” by Heart)