YMA hi Mizo khawtlang nun min phuar khawm tu, khawvel changkanna hrang hrangin min chen chilh hnu pawh a, Mizo taka ram leh hnam a dam khaw chhuah theih nan a min chelh tlat tu, kan hnam rohlu tlawmngaihna mei mit lova kan vawn nun theih nân a pawl pawimawh ber a ni. Kan hnam, kan ramin changkanna kawng a zawh zel a, ram dang atanga kan ram tlawhtu pawh kan nei tam ta hle a, chung mi te chuan an sawi tam ber leh mak ti a an sawi fo chu ‘Nghah loh Dawr’ leh kan Motor tlan dan (traffic system) fel fai lutuk hi a ni. Thuawih leh kaih­hruai nuam tak hnam kan nih bîk chhan hi an zawng fo thin a, an hmuh  chhuah tak chu Mizoramah hian tlawmngai pawl chak tak leh tha tak YMA a awm a, chu chuan Mizo thalaite nunah tlawmngaihna leh midangte tana inpekna, inngaihsaktawnna leh inzahtawnna an nunah a tuh tlat a ni tih hi an hmuh chhuah thin chu a ni. 

Tanpui ngai an awmin tunge che chhuak hmasa ber a? Tu nge tanpui ngai dap a, tuamhlawm thin tiin zawhna awm ta se Mizo thinlungah chuan YMA a ni ngei ang. Chu YMA chu a ni, Mizo tak leh kan kristianna nen a inhmeh tak chunga i lungngaih leh puih i ngaih huna pui tur che chu. YMA hian kumpuan vawi tam tak thupui chi hrang hrang neiin, kan ram leh hnam tan hma la in, kan hnam hmasawnna turin a theih­tawp a chhuah thin a. Mi nawlpui in kan tih peih loh leh kan ngaih­ven peih loh buaipuiin a tul tul a thawk hmiah hmiah mai zel a. Mi tih lunghnur emaw thu inchuh deuh rap emaw mi tih lawm vek sen hek lo le, tu emaw lungawi loh avang leh tu emaw in a ngaihthah vanga he pawl hi zuih mai turah ngai suh! He pawl hi Zosap Missionary te din a ni tlat. 

YMA hi zofate min phuar khawmtu leh ram dang mite lakah pawh zonun zemawi pho langtu ber a ni a, kan hlimni leh kan chhiat that a, min tawiawm tlat tu a ni a, YMA chu veng chhungah eng mi pawh chhiat an tawh huna a tawp thlenga lusun chhungte tan a ding tlat thin a ni. Ram danga awm Zofate pawh hian YMA hlutzia an hre chiang hle a, a theihna apiang­ah zonun zemawi chawi nun an tum zel a, an awmna hmun theuhah that chhuah an  tum thin. YMA hian thlei bik tumah a nei lo va, mi chhia leh tha, mi lian leh te pawh a thliar ngai hek lo, a neitu chan chang thiam apiang tan a ni a, YMA chuan harsatna hrang hrang i tawhin a tawp thlengin a phatsan ngai lovang che. Dampui tham, thatpui tham, nunpui tham he pawl thianghlim YMA-ah hian i tel zel ang u.

YMA hi Mizo Hnam in­nghahna lungphum pawimawh tak a ni a, he lungphum hi kan thinlung ah kan phum ngheh a, kan rilru ah kan sawhngheh a ngai hle, he pawl a inhman mai hi a tawk lova, a taka kan chet chhuah a, kan nunah kan lan chhuah tir a, midangte entawn tlak leh phut luih nei lova kan inpek chuan zo nun ze mawi hi kan thinlungah kan phum nghet mai dawn a lo ni. Chanhai, riangvaite belh ngam YMA, hmeithai te chhawmdawl a, a tul apiang thawk tu YMA, chhiat tawh a che hmasa ber YMA, kan ram tan hian innghahna tlak leh zo nun ze mawi chhawm nung a, thangthar lokal leh zel tur te tan a, pawl belh­tlak leh kan thinlung a Mizo nih ti nuamtu, he pawl ropui hi a meichher chhi eng zel turin nang leh kei hi kan pawimawh hle. 

Mizo khawtlang nuna hmun pawimawh luah tu lian tak pahnihte chu Kohhran leh YMA te hi an ni ti ila kan sawi sual awm lo ve. Mi tam takin Kohhran leh YMA kan en dan erawh a in pelhsawlh deuh em aw a tih theih. Tunlaiah hian mi tam tak chuan a khawi emaw zawk zawk kan hlamchhiah deuh niin a lang a. Kohhran lama phur hle si YMA hun pawimawh a lang ngai leh si lo te, YMA lama phur em em,  Kohhran ngaihsak leh miah lo hi kan thahnem ta viau niin a lang. 

Missionary-ten Kohhran min rawn din sak dan te hi kan hre viau a, YMA lo pian dan te hi kan chiang ta hlawm lo nge kan ngaihven tawk lo ni ang? Kristianna a lo luh hnuah kan Missionary-te khân zawlbuk kha tha an tiin chhawm nun zel an duh a, kan nunphung nen erawh a inmil tak si lovah chuan khawtlang inrelbawlna kawngah Mizo ze tha tak nena Kristian nunkawng dik kan chhawm nun zel theihna atan YMA hi a lo piang ta a. Chumi  avang chuan YMA hi Kohhran note ti pawhin an sawi hial a ni.

Kohhran lama phur taka rawngbawltute hian YMA hi kan rawngbawlna peng a ni tih hi kan hriat thar a tul hle a ni. Chutih rual chuan YMA lama a kul a taia rawngbawl thinte pawh hian YMA ringtu Kohhran hi kan belin kan ngaina ve bawk tur a ni. Kristian nun dan tha ngaihsan tih thupuia neitu YMA leh a hringtu Kohhran hi kan awm ve ve na tur leh kan rawngbawl ve ve na tur a ni tih kan hriat a, kan zawm a pawimawh hle ang. Kohhran leh YMA hi a kal kawp tur a ni tih hria in, inhmang hrang tur kan nilo tih hre thar ila, tumah hi inhmang hrang lovin Kohhran leh YMA-ah hian kan theih tawp i chhuah zel ang u.