Ultrasound a check up ka tihin a normal char char thin a. A hnuhnung ber khan ka thin a khawng (fibrosis) deuh tan an tia, a lo vung a, bakah bilirubin tlemin a lo sang a. Fatty liver nei ngai miah lo ka nia, grade 2 tiin ka report-ah a inziak a. Thin huat zawng tur ang zu etc ka ti ngai lova, Mizopa diet pangngai ka ei a ni mai a. Hetiang hi eng vanga awm thei nge? Engtin nge ka tih zel ang? - Chhandama, Bawngkawn

Chhanna: Thin vung kan tih mai hi Hepatomegaly tiin kan sawi thei awm e. Thin len chhan hi chi hrang hrang a awm thei a. I rawn sawi “zu” vanga thin lian/vung hi tunlai kan ramah chuan a chhan common ber a ni awm e. Tin, Fatty Liver (thau thin bawh tiin kan sawi mai thin) hi kan thinah thau bawhtu a tam vanga lo thleng a ni a, zu bawk hi a chhan common ber zinga mi a ni a. Chutih rualin zu in ngai miah lo ah fatty liver hi a awm thei a, chutiang chu Non-Alcoholic Fatty Liver (NAFLD) an ti a, kei pawh hian ka lo hmu fo mai.

Kan thin hi kan taksa organ zinga pawimawh em em mai, kan ei leh in atanga kan taksa mamawh leh mamawh loh lo thliar hrang a, taksa peng hrang hranga thisen kal tlanga sem zai tu a ni a. Thin function a buai chuan kan taksa mamawh loh hi a inkhawl hma a, thau (fats) pawh kan lakluh tam lutuk chuan emaw, kan taksa in a chawhsawm (digest) that theih loh chuan (zunthlum nei ah te a common) a lo inkhawl hma a, chu chuan Fatty Liver hi a rawn thlen ta thin a ni.

Fatty Liver hi Grade I-III in kan then deuh ber a. Taksa rit lutuk (overweight) ah te hian a awm duh hle a, zunthlum control tha lo te hian an nei duh hle bawk. Thin ah thau a tam lutuk chuan a hnathawh a lo buai a, a timur lamah te danglamna a thlen a, chu chu control vat loh chuan engemaw hnuah chuan a rawn khawng (fibrosis) thei a, chutiang chu a lo thlen laklawh tawh chuan thinsawng kan tih mai, Cirrhosis hi a lo thlen thuai thin a ni.

Mahse thin hnathawh buai hi a lang chhuak har phian a, insawiselna nei miah lo chunga Fatty Liver Grade III lai lo ni tawh te hi an awm leh nawlh thin. Thin function test (LFT) hi thin hnathawh buai ah chuan a result ah fel lo a lang thin a, mahse chutih rualin LFT normal vek chunga Fatty Liver emaw Fibrosis nei hman te hi an awm leh nawlh bawk thin a ni. 

A dang leh ah chuan Viral Hepatitis (hrik vanga thin vung) hian thin chu a ti buai duh hle. A bik takin Hepatitis B leh C te hi an thawm a zawi em em mai a. Thisen test nachang hre lo phei chu heng hrik an lo kai hian zawimuangin thin a ti chhia a, insawiselna an neih meuh chuan thin hi a lo chhe thuk hman fo thin a ni. Chuvangin in test nachang hriat a pawimawh hle. Kan lo kai anih chuan treatment lak thuai a finthlak a, a tihdam theih bawk a ni.

I thin vung pawh hi enge a chhan ber chu a hriat mai loh na in a chunga kan tarlan ang te hi hriat tum ta la. I overweight anih chuan weight loss i mamawh nghal hle tihna a ni a, diet control leh exercise a pawimawh hle dawn a ni.