ZALEN July 18, 2025 : Serchhip SP Gavit Gogna hovin vawiin khan Serchhip District-a Police Station hrang hranga thubuai awm mek leh an dinhmun tlangpui thlirletna hun ‘Crime Review Meeting’ neih a ni a. Kum 2024 kum chanve (Jan-July) aiin kumin kum chanve chhung hian Serchhip District-ah Case 29-in a tlem zawk tih meeting-ah hian tarlan a ni.

Report atanga a lan danin, nikum 2024 (Jan-July) chhung khan Serchhip District pumpuiah Case 101 ziahluh a nih laiin kumin 2025 Jan –July ni 18 thleng hian Case 72 ziah a luh a ni thung a. Kumin January atanga July thla thleng hian thubuai nei mi 76 man niin, chung zinga Case 24 te chu Court in thiamloh a chantir (Convict) a ni.

Crime Review Meeting-ah hian Serchhip District chhunga Police Station 3: Serchhip PS, Thenzawl PS leh N.Vanalaiphai PS a OC leh 2nd OC te telin, dan leh thupek (Law & Order) kenkawh kawnga hmalak zel dan tur bakah, chak zawka Police te hnathawhna tur atana tul leh pawimawh hrang hrangte sawiho a ni.