ZALEN May 17, 2025 : Vawiin khan Zarkawt Community Hall ah MBSE hnuaia HSLC leh HSSLC -2025 exam a Science leh Mathematics subject a mark hmu sang ber (topper) te hnenah chawimawina "STAM Proficiency Award" semna hun hman a ni a, JH Zoremthanga, Chairman, Mizoram Board of School in Khuallian niin a hmanpui.

Kum 2017 atang khan Science zirna in hma a sawn theihnan zirlai titha te chawimawina hi STAM in a buatsaih thin a, sumfai tumsaktu atan Science zirna a tui mi leh mi hlawhtling, mi hming tha sawm an ni. Award hian Cheng singkhat, memento, certificate leh STAM Dictionary a keng a ni. 2025 STAM Proficiency Award hetiang hian sem a ni.

HSLC

1. STAM- Prof. Rualkhuma Colney - Science Award dawngtu C. Lalvenzuala S/o C. Laltlanzova, St. Pauls Higher Secondary School, Aizawl.

2. STAM- Dr. H. Lalthlangliana- Mathematics Award dawngtu Lalrohlupuii d/o Vanlalrema, Little Kingdom School, Aizawl

HSSLC :

1. STAM - Er. Zoram Thanga (USA) - Mathematics Award dawngtu Emmanuel Lalmuanawma s/o Zirthanga Pachuau, St. Paul's Higher Secondary School, Aizawl.

2. STAM - Er. Lalchungnunga ( USA) - Physics Award dawngtu Cynthia Lalhlupuii Shangpliang, St. Paul's Higher Secondary School, Aizawl.

3. STAM - Er. Zoram Thanga(USA)- Chemistry Award dawngtu Cynthia Lalhlupuii Shangpliang, St. Paul's Higher Secondary School, Aizawl.

4. STAM - ZET- Biology Award dawngtu Cynthia Lalhlupuii Shangpliang, St. Paul's Higher Secondary School te anni.

He hunah hian pawl 9 leh 10 zirlai te tan Science Article inziahsiak lawmman sem a ni bawk a, sumfai leh certificate pek anni.

Article inziahsiak lawmman latute chu:

1na : LH Laltleipuii, Holy Faith School, Lunglei.

2na : Mercy Lalawmpuii, Synod Higher secondary school, Aizawl.

3na: Lalhmingsangi Hnamte, St. Paul's Higher Secondary School te anni.

Khuallian JH Zoremthanga'n zirlai titha te lawmpuiin duhsakna a hlan a, sumfai thawhtu te hnenah lawmthu a sawi bawk a. Tuna chawimawina an dawn hi bul tanna chauh anih thu hrilhin zirna in tha a lut thei turin inbuatsaih turin a fuih a, Mizoram in kan mamawh thiamna pawchhuak turin a chah bawk. Khawvel huap-a zirna in tha a lut tur leh hna ah pawh Mizo te hian kan tlin thu a tarlang.

Khuallian chuan Israel fate an dinkhawchhuah theihna Deuteronomy 6:4 thu vawng tlat turin zirlai kalkhawm te a chah a, thinlung zawng zawnga Pathian hmangaih tlat turin a fuih a. MBSE in Science leh Mathematics zirlai Bilingual (English leh Mizo tawng) a siam hi zirlai ten an tangkaipui thu a sawi a, kum hmasa lam aiin Science subject pass an tam zawk thu a tarlang bawk.

Sumfai thawhtu te atangin Prof. Rualkhuma Colney, STAM Adviser leh ZET aiawhin zirlai te fuihna thu an sawi bawk a.