ZALEN April 23, 2025 : Mizoram sawrkar Sports & Youth Services Department, Athletic Federation of India leh Innovations India Pvt. Ltd. te tangkawp chuan April ni 26, Inrinni hian Rajiv Gandhi Stadium, Aizawl-ah, Aizawl International Half Marathon an buatsaih dawn a. Vawiin khan Marathon T-Shirt tlangzarh a ni.

He intihsiaknaa tel duh te tan naktuk (April ni 24, zanlai dar 12:00) thleng hian inziahluhna hun hawn a la ni. Hriat theih chinah online leh offline-in mi 500 velin registration an ti tawh a, he intihsiaknaah hian India ram state 10 atangin inziaklut an awm tawh a, Heng zingah Railways, Army, Paramilitary force runner te pawh an tel.

Intlansiak hi Rajiv Gandhi Stadium leh Silaimual inkara tlan a ni dawn a, hemi hun chhung hian helai kawngpui hi khar a ni dawn a ni.

Intihsiakna hi hlawm thum a then a ni a, Half Marathon - km 21.097 a thui te; Open Race - km 10 a thui te bakah Fun Race - km 5 a thui te a awm dawn a ni. Intihsiakna hlawm thum bakah hian naupang kum 10-15 inkar te tan ‘Junior Race’ - km 5 a thui buatsaih a ni bawk ang.

Intihsiakna hlawm tinah hian mipa leh hmeichhe tan lawmman tha tak tak siam a ni a, cheng nuai 10 sem chhuah a ni dawn a ni. Hmeichhia leh Mipa bika pakhatna te chu Vietnam trip buatsaih sak an ni dawn bawk.

He intihsiaknaa inziaklut duh te tan website - www.aihm2025.com ah emaw Millenium Centre, Aizawl kawtah offline registration kalpui mek a ni a. India khua leh tui tan cheng 799 chawiin a inziahluh theih a, ramdang mi tan dollar 30 chawi a ngai thung a ni. College leh sikul zirlai te chu an student ID hmangin cheng 99 chauh chawiin an inziaklut thei bawk ang.

Half Marathon (21.1km) darkar thum chhunga thleng te tan Finishers Medal sem chhuah tur a ni dawn a, thlan thleng zawng zawng te hian ni 21 chhungin inziahluhna website aṭangin Certificate an download thei dawn bawk a ni.