ZALEN June 25, 2025 : Aizawl Tennis Court chhehvela chawhmeh zuar thin te chuan thut phal an nih lohna chhan chu AMC lamin Treasury Bazar kang ta a thu thin te, AMC Multi Complex, Tuikual South-a thut tir an tum luat avanga an intiamna vang niin an sawi.

Aizawl Tennis Court chhehvela thute chuan anni chu thingtlang lam mi vek an nih avangin AMC-ah vote an nei ve lo a, chuvangin an thu leh hla pawh ngaihtuahsak lo niin an sawi a, Treasury Bazar-a thu thin, AMC Multi-Complex-a thu ta te erawh AMC-a vote nei vek an nih avangin an intiamna pawh an tihhlawhtlin sak an ni an ti.

Aizawl Tennis Court chhehvela thute chuan sawrkar lam leh AMC lam an dawrna atangin hmalak ngaihna pawh hriat a har an ti a, an mi dawrte hi an inpuhtawn niin an sawi. AMC Multi-Complex Building chu an tana ruahman a ni ve lo an ti a, Treasury Bazar-a thute thutna tur a ni a, an tan len ve ngaihna pawh a awm lo niin an sawi.

Tun hnaia an thut tirnaah hian mi 80 vel thutna turah mi 200 vel an beng a, a dawr tur tan pawhin kal ngaihna awm lo khawpin a tawt an ti. In hralh a harsa a, thutna an sawn kual nasat avangin an regular customer te pawhin an hmu zo lo fo niin an sawi. Kawng kama an thut lai kha chuan ni khatah cheng 2,000 atanga 3,000 te an hlawh theih laiin tuna AMC Multi-Complex-a thut tir naah hi chuan chawibelh te pawh an awm thin an ti a. A tira an thut tirna building hnuai berah erawh kha chuan tlem chuan an zia an ti.

AMC lamin AMC Multi-Complex-a an thut tir dawn khan Smart City kalpui mekah veng dang kawng dunga in zuar te pawh tih tawp an nih dawn an tih avangin thu awih takin an lut a, mahse, thla thum hnuaha pawh hmun dang bazar tihtawp tumna reng reng a awm lova an hriat avangin Inrinni kalta 21.6.2025 khan lungawi lohna an lantir ta an ti a, an kawng dan tuartu te chungah pawh ngaihdam an dil.

Venghlui leh Tuikual South area a thute chuan heng veng Local council ten ruahmanna an siamsak thin danah lawmthu an sawi a, AMC-a lo pian hnuah pawh khan India dan chhunga The Street Vendors (Protection of Livelihood and Regulation of Street Vending) Act, 2014 hmanga dikna leh chanvo an neihte an hrilh thin an ti a, 2017 khan an dawhkan leh ID te pawh an siamsak vek a ni an ti bawk.