ZALEN May 18, 2025 : Aizawl Municipal Corporation (AMC)-in Aizawl khawpui chhunga vawk vulh khapna dan a kalpui mek chuan zawm a hlawh tawk lo nia thu dawn niin inzirtirna kalpui a la ngai nasa hle nia thu dawn a ni.

AMC hotute hnen atanga ZALEN thudawn danin danin phal chin neia Aizawl khawpui chhunga vawk vulh khapna dan kalpui mek chungchangah hian AMC-a vulh chhunzawm dil mi 8,000 chuang an awm thin a, hengte bakah hian phalna dil lem loa vulh chhunzawm zelte pawh an awm.

Thudawnna chuan AMC-in dan a siam chu mipuiin an la zawm tawk lo hle niin a sawi a, chumi vang chuan inzirtirna neih a la ngaih nasat thu te, pawisa chawitira hremna pek pawh mi thahnem tak an awm tawh thu te a sawi.

AMC-in vawk vulh khapna dan a siam chu ennawn zawh thawkhat tawh niin tunah hian rawtna nei duh tan hun hawn mek a nih thu te thudawnna chuan a sawi bawk.

June 8, 2023-a AMC Board of Councillors meeting neihin thutlukna a siam tawh angin Aizawl khawpui chhung a lo thianghlima mipui an hrisel zawk nan leh lei min avanga chhiatna a lo thlem zawk nan mihring chenna in atanga feet 100 aia hnaiah vawk vulh khap a ni a. He khapna hi January 15, 2024 atanga hman tan a ni.

He kaihhruaina chungchanga harsatna bik neite chuan local council leh an chenna in hnai berte phalna lain AMC-ah ngaihnathiamna a dil thei a, local council kaltlangin AMC-ah dilna siam tur a ni.

Vawk vulh khapna dan zawm lote chu Mizoram Municipalities Act, 2007 hmangin hrem theih an ni.