ZALEN May 19, 2025 : Treasury bazar chu March 17, 2025 zinga a kan avanga luah zui theih a nih tak loh avangin helai hmuna inzuar thinte chu Aizawl Municipal Corporation (AMC) building, Tuikual South-ah suan luh an ni a. AMC chuan kum khat chhung an thut man hi a chawitir dawn lo a ni.

Hetih lai hian Treasury bazar-a inzuar thinte chuan a hmaa an inzawrhna thin an pha lovin an inhralh tha lo hle niin an sawi.

Treasury Bazar Association President HL Chhingpuia chuan a hmaa an thutna leh tuna an thutna hmun chu a inthlau hle tih sawiin, “A hma kha chuan kan thutnaah khan mi kal vel an tam a, chung zingah chuan duh chawp vanga lei eng emaw zat an awm a. Tunah erawh chuan kan awmnaah hian an kal peih lo va, ni danga kan inhralh chanve vel chauh hralh ang kan ni,” a ti.

Treasury Bazar Association Secretary Lalrinawma pawhin an inhralh tha lo tih sawiin, “Kan thutna hmasaah kha chuan veivak zingah it chawp a lei an tam a, tunah erawh chuan pan ngai kan nih tak avang hian mi tam takin min pan peih lo va. Kan thutna hmasa nen chuan kan inthlau hle a ni,” a ti a. Inrinni tuk danga ar 50 vel sat zo thin kha tuna an thutna tharah chuan ar 20 vel chauh an sat niin a sawi bawk.

Vawksa zuar pakhat pawhin a hma an phak lo tih ZALEN hrilhin, “A hmaa min dawrtu tam tak, vei vak zinga it chawpa leite kha an awm tak loh avangin kan hralh tlem a. Inrinni bikah erawh chuan tlemin kan ziaawm hret a ni,” an ti a. Sangha zuarte pawhin hmun hrang hrangah zawrhna a tam avangin mipuiin an pan peih lo tih sawiin a hma an in hralh ang kha an pha lo hle tih an sawi.

Chem leh bungraw hrang hrang zuar pa pakhat chuan an thil zawrhte hralh loh ni a nei fo nia sawiin tuna a thil zawrhte chu tlawm deuha tihrala thil dang zawrh mai a tum niin ZALEN a hrilh bawk.

Treasury bazar denchhen hian Sesawng khua leh hmun dang dang atangin Inrinniah mi tam takin an thlai tharte an thutpui thin a; mahse, hengho pawh hi AMC lamin bazar tharah hian suan luh vek tur a tih avang leh thut chhunzawm a phal loh vangin an thu thei tawh lo a. Helai hmuna inzuar thin nu pakhat chuan, “Thakthing, Chanmari, Ramhlun leh hmun dangah pawh Inrinni ah thu an la awm tho a, keini pawh Inrinni bak kan thu chuang lo chungin hnawk min tia thut an phal lo bik hi chu hriat thiam a har khawp mai,” tiin ZALEN a hrilh.

Kangmeiin a tihchhiat tak Treasury bazar hi thenfai a la ni lovin a la hnawk nuai mai a. Bazar hluiah hian AMC chuan mipui kea kalna kawng siam a tum nia thudawn a ni.