ZALEN July 5, 2025 : MHIP Day vawi 51-na lawmna chu Tuikual South Branch MHIP chuan vawiin khan Tuikual South YMA Hall-ah vawiin khan an hmang a, AMC Dy. Mayor R. Thanglura, Ward XII Corporator chuan Khuallian niin a hmanpui.

MHIP Day hmanpuitu AMC Dy. Mayor R.Thanglura chuan, "Engtin nge ni ang? tih hi tun huna Zoram dung leh vanga nuho zawng zawng ngaihtuahnaah riak se ka duh a. Nitin maia ruihhlo thahnem tak tak man thawm awm ta reng te, khawilai dung leh vanga kan tu kan fate, ruihhlo avanga harsatna tawk fuankhawm nguai nguai han hmuhte hian chhungkaw nu zawng zawng ten engtin nge ni ang ti a tuamdam hna kan thawh theih dan tur leh ruihhlo laka kan tu kan fate an him theih ang tih hi bengsika ngaihtuah turin ka ngen a che u,"

"Kan ngaihhlut zawng kan thlak a tul a, kan tu leh fate, kan chhungkua theuh leh kan hnam hmakhua atana in theihna a thara hmang turin ka ngen che u a ni," tiin "Fai leh thianghlimna kawngah pawh kan nuhoten mahni inchhung atang theuhin a tharin hma han la leh ula, Aizawl khawpui thianghlimna tur hian hma han hruai ang che u," a ti bawk.

Thanglura chuan, "Kum sawm lai mai Ward Corporator nia khawtlang tana kan thawhhonaah in duhkhawp ang ka lo tlinglo anih chuan MHIP Day-ah hian in mi ngaihdam ka dil a ni," a ti bawk. MHIP Day lawmpuina atan R.Thanglura chuan lawmpuina thilpek a hlan a, Branch MHIP-te hian lawmthu sawina thilpek an hlan ve bawk a ni. R. Thanglura hi a nupui Lallianpuii'n a tawiawm a ni.

Tuikual South MHIP Day lawmna hi President Zonunsangi'n kaihruaiin, Tuikual Pastor Bial enkawltu Pastor Lalhmuchhuaka'n hunserh a hmang. Secretary Lalnunthari hnen atangin report ngaihthlak a ni a, MHIP General Headquarters President thuchah a chhiarchhuak bawk.

MHIP thuthlung sawi rualna hun hmangin Fin. Secretary Lalbiakmawii'n a kaihruai a. Member thite sunna hun Treasurer H.Lalawmpuii'n a hmang bawk. Tuikual South MHIP hian kum 2024 July thla atanga kum 2025 July chhungin member 14 lai an sun a ni.

Tuikual South Local Council, Branch YMA , Branch MUP leh Games & Sports Association-te atangin thusawi tawi ngaihthlak a ni a. MHIP Day lawmpuina an hlan theuh bawk a ni. 

Asst.Secretary Lalbeiseii'n member chawimawina hun kaihruaiin MHIP Member Lalsangzuali Ralte, term thum lai Local Council member tling thei hnenah chawimawina thuziak leh puanchei an hlan a ni. Hemi rual hian member kum 70 tling chinte hnenah MHIP hian thilpek an hlan bawk a ni.

Lalduhsaki'n kalkhawmte hi zaiin a awi reng bawk a ni.