ZALEN December 9, 2024 : Vawiin hian Mizo Hnam Runah chhung inkhawm neih a ni a, Opppsition Leader Lalchhandama Ralte, MNF Vice President chuan, "Kuthnathawktu thawkrim tak takte thawhrah hi sawrkar hian a intiam ang ngeiin lei sak rawh se. January atanga May chhung chauh thlaite lei an tum leh si hi kuthnathawktute hmuhsitna a ni. India sawrkar hian thlai thlan bik 24-ah kum tluana support price a pe ang hian, hun rei lote chauh hawng lovin kum tluanin support price pe ve rawh se. An intiam ang ngeiin thlai Hmarcha, Sawhthing, Aieng leh Hmunphiah hi lei rawh se. Eng eng emaw dan phuah kual phauh kual lo hian kuthnathawktute tharchhuah ang ang hi a leina tur rate an sawi ang hian leisak rawh se," a ti.

Chhantea chuan, "Tunah loneituten thlai an thar tan a, krismas thawmhnaw lei nan te, kohhran thawhlawm atante loneitute hian Krismas hma ngeia hman an duh a. An mamawh em em a ni. Chutiang a nih laia kum thar lam daiha lei an tum hi a dik lo," a ti a. "Tin, transport subsidy siam si lova Collection center tlem a zawng chauha thlai thar lei an tum hi a dik lo a. Thingtlang khaw tinah sawrkar hian lei rawh se," a ti bawk.

Leader of Opposition chuan, "ZPM sawrkar hian hralh tur an zawng nasa hle a. An sawrkar phatah ZMC leh Airport hralh an sawi a, small hydel project zawng zawng hralh an tum a, Chaltlang Tourist lodge hralh an tum bawk a," a ti a. "Pu Laldenga leh Pu Zoramthanga te vei em em, Congress-in kut an thlak nasat Lengpui Airport hralh an tum ngar ngar hi ngaihtuah nawn turin kan ngen a ni. AR leh Sipai dangin kan ramah hmun tha tak tak an luahte umchhuah kan tum mek laia an kuta Zofate rohlu hlan an tum hi rem kan ti lo. MNF chu na zawka che turin kan inpeih a ni," a ti. 

MNF Vice President chuan, "Politics-a phuba lak nan MSSSB an thiat a, MPSC kan thuam tha ang, an ti a. An thuam tha ta em? MPSC-ah hian sawrkar a inrawlh thuk lutuk nge an hming hliau nasa ta hle a. Kum tira Entomologiest an lak tura kum tira short list siam tawh chu an cancel leh vek a. Screening an ti tha leh a, mi thar a rawn lut nawlh a, a tling ta a. Chu mai bakah Vety Asst. Surgeon lak tur result a chhuak a. Exam lo panga an tling a ni. Tun hnaiah buai chuar a tam hle. MPSC hming hliau ta hi a pawi ka ti hle a, sawrkar hian MPSC rintlak a din leh theih nan hma la rawh se," a ti bawk.

Chhantea chuan ZPM sawrkar chu hnam thilah MNF leh Congress aṭangin zirlai zir se a duh thu a sawi a. "Hnam thil a awm reng rengin opposition te hian sawrkar kan thawhpui thin. All NGO leh All Party anga hmalakna tur thilah an mahniin an duh duhin thil an ti thin hi a fuh lo. Hnam pawi an sawi a hlauhawm ta hle," a ti a. ZPM kum khat sawrkar chu an sawi loh ang hlira an awm avangin thalai, sawrkar hnathawk leh kuthnathawktute support-na a tlahniam nasa hle tih a sawi bawk.