ZALEN, May 19, 2025: An nu leh pate inneih kum 12-na champha puala unau thum naupang têtê-ten an ziah lehkhabu theuh chu Inrinni khan Central YMA Hall, Tuikhuahtlang, Aizawlah Rev. Zosangliana Colney-in a tlangzarh.

Lehkhabu tlangzarh takte hi Moses Lalawmpuia ziah, ‘50 Men of Faith (From Bible, Disciples of Jesus, Missionaries & Athletes)’; Easter Lalpekhlui ziah, ‘I Nun Thlak Danglam Turin (Naupang Thawnthu Tawi 30 - Zawhna leh Chhanna Nen)’ leh Shepherd Zomuani ziah, ‘30 Children’s Stories & 1 Poem’ te an ni.

Tlangzarh hmaa lehkhabute thlirlawktu, Dr. Laldinpuia, Mizoram University chuan ‘May 17, 2025 an inneih kum 12-na champhaa an fate lehkhabu ziak tihchhuah’ tia chhungkuain thutlukna an siam chu nu leh pa dangte intiam ngam loh tur nia a hriat thu a sawi.

Khawvel huap pawhin unau thuma a ruala lehkhabu tichhuak chu an awm pawh a rinawm loh hial thu a sawi a. “Mi tin hian lei in chhiar ve se, lehkhabu ziaktute tawngtaina ang takin, ‘an hlawkpui ngei ngei’ ka ring,” a ti bawk.

Moses, Easter leh Shepherd te nu, Ammie Lalnunpuii hian nikum khan naupang/fate enkawl dan lehkhabu, ‘Formula 3-2-1’ a lo ziak tawh a, hei pawh hi nu leh pa tam takin an fate enkawl nana rintlak lehkhabu a nih thu an sawi hlawm.

Lehkhabu tlangzarh takte hi lehkhabu dawr hrang hrangah lei theih a ni a, Rs. 250 man theuh a ni.