ZALEN May 20, 2025 : Tukin zinga Kolasib district a ruah sur nasa avangin Bairabi-a in pali chu tuilianin a chim a, he thil thleng avang hian khawtlang an buai hle.

Bairabi North VCP B. Laltholeha hnen atanga ZALEN thudawn danin tun tuma an khaw chhunga tuilian hi tui tam satliah vang ni lovin an khaw chhunga an tui luan kawr, Hume pipe an phum chu kum tela a tlakhniam avanga tui a luan that loh vang a nih thu a sawi.

An khaw chhung hmun hniam laia hume pipe phum hi a tira a phumna atangin a pil tial tial niin Bairabi North VCP hian a sawi a, tuna helai kawng siamtu NIDHI INFRASTRUCTURE PVT LIMITED COMPANY pawh an hrilh tawh tih a sawi a, mahse, an hnathawh tur an chhanna turah a tel loh avangin an siamsak theih loh thu an hrilh tih ZALEN a hrilh.

Bairabi North VCP B. Laltholeha chuan an khaw chhunga hume pipe phum hi tha taka siam a nih loh chuan tun dinhmun ang hi tun ang hunah pawh tawng thei an nih thu a sawi a, ruahtui tam zawk hmachhawn a huphurhawm a ti. Tui lian hmachhawn an nih loh thu leh tuihawk luan kawr that loh vanga hetiang tawng hi an nih thu ZALEN a hrilh bawk.