ZALEN May 29, 2025 : Zoram Infrastructure And Industrial Development Corporation (ZIDCO) leh Lushai Organics te tangkawpa (PPP Mode) hmalakna, Aieng sawngbawlna Luangmual Industrial Growth Centre-a mi Zoram Turmeric Processing Industry chu Dr. KC Lalmalsawmzauva Adviser to CM (Handholding) in a hawng a, he project hi Banakaih (hand holding) hnuaia thlai thar sawngbawlna (processing) hlawhtling hmasa ber a nih thu a sawi.

Dr. KC Lalmalsawmzauva chuan, "Pu Lalduhoma Chief Minister kaihruaina hnuaia Aieng Sawngbawlna hmun kan han nei thei tur hi lawmawm ka ti hle a, he hmalakna a hlawhtlin theihna tura buaipuitu ZIDCO leh Lushai Organic te chungah lawmthu ka sawi a ni. He Mizoram Turmeric Processing Centre hi Bana-kaih hnuaia processing kan tih hlawhtlin hmasak ber a ni a. Aieng chauh nilo, Sawhthing pawh a khawih tel thei tura beisei a ni a. Duhkhawp Aieng her tur a awm loh pawhin sawhthing sawngbawl nana hman theih beisei a ni," a ti.

Adviser to CM (Handholding) chuan, "Aieng hi tualchhung chhunga tih ral tura policy duan a nih avangin sawhthing te anga tam tak thar kan tin zawn ber a ni rih lo a; kan mamawh intodelh thei tura ngaihtuah na sen a ni. Chuvangin, collection centre pawh kan siam lo a ni. A Support Price thuah pawh factory rate-a siam a ni a, Lo neitu ten an hralh duh chuan factory-ah an phurh thlen a ngai a, a hring Rs. 20/- (15+5), A ro zaihlep (slice dry): Rs. 130 (125+5), a thlar chawpa tih ro (Finger dry): Rs. 150/- (140+10) a ni dawn a ni. Tun dinhmunah sawrkar rate aia sang lo neituten an hralh theih avangin support price hi sen a ngai ta rih lo a ni. He project-ah hian Aieng leina (capital expenditure) tur belh tel a nih avangin, nakumah pawh engemaw zat hi chu lei thei turah kan in ngaia, a hralhna (Market) thuah pawh Pu Sanjit Kumar Dey, Bama Dawr, Aizawl te nen thawh ho kan tum a ni," a ti.

Lushai Organics CEO H. Lalchhanhima pawhin thu sawiin, "Vawiin thleng hian Aieng 400 Qtls kan lei tawh a, lei chhunzawm zel kan la tum a, 1000 Qtls tal chu kumin hian lei kan tum a ni. Aieng hi thlai dang ang a ni lo a, dimdawi leh uluk ngai tak a ni a, uluk takin a sawngbawl hna hi kan kalpui a ni. Tunah hian Slice dry demand a tam ber a, a dawtah chuan a powder a ni leh a, hei bakah hian pum dandawi siam nan kan hman bakah sahbawn siam nan leh Hmaihnawih (Face pack) siam nan bakah Termaric Juice siam nan kan hmang dawn bawk a ni. He lai hmun atang hian Zoram mipui mamawh tam tak hi phuhruk theih kan tum a ni," a ti.