ZALEN July 10, 2025 : BJP National Secretary for Minority Morcha Delson Notlia chuan vawiin khan Aizawl Press Club-ah chianchinthar lakhawmtute a kawm a, Home minister-in Chakma Autonomous District Council (CADC) chungchanga Council of Minister duhdan anga Governor-in thutlukna a siam loh vang a, sut leh tura an tihna chu a chhanglet.

BJP National Secretary for Minority Morcha chuan BJP Mizoram Pradesh chuan Home Minister K. Sapdanga'n mipui rilru hruai kawi zawnga thuchhuah siam a, Governor chu democracy bawhchhia anga a sawi an dem takzet thu a sawi. CADC thiat anga ZPM ten thuchhuah an siam chu thu dik tawk lo a ni a, thiah ni lovin thla ruk chhung Governor enkawlna hnuaiah an awm dawn zawk a ti.

Delson Notlia chuan, "CADC-a BJP-in December 2024-a Executive Committee an siam khan ZPM sawrkar kaihhruai chuan amah K. Sapdang telin an dodal a, CADC MDC nghet lo lutuk chu thiah an duh thu an sawi. Governor pawmpui tura file kal chu Chief Minister leh DC&MA Minister chuan Council chu thiat turin thurawn an pe a, CADC inrelbawlna tha lo lutuk leh an hruaitu inthlak reng mai chu an chhuanlam a ni, a tirehna tha ber chu Council thiah a ni, tiin inthlan that an rawt."

"Tunah ZPM chu sawrkar siam thei dinhmuna an din takah hian a hruaitu ngaite tho hian CADC-ah ZPM Executive Committee din turin na takin an nawr leh lawi a, hei hian thuneihna chan an chak zia a tilang a ni. December-ah BJP sawrkarna siam tur an dodal a, khatiang chiah dinhmun a thlen hnuah ZPM te hian rilru dang an pu leh hi hriatthiam a har a ni," a ti.

Delson Notlia chuan, "BJP chu a dinna-ah nghet tak ding thin a ni a, Governor-in sawrkarna nghet leh thianghlim din a duhna hi kan thlawp a. ZPM hruaitute hian Governor hi dem lovin constitution hnuaia inenkawlna tha zawk a awm theihna tur hi thlawp zawk se kan ti," a ti.

"Governor thutlukna hi Constitution behchhan niin party politics a lo hman chi a ni lo a, Governor lo dem hi constitution hnuaia thawhhona tichhe thei a ni a, ZPM ten an duhdan kalpui an tumna hi dan zahlona a ni," a ti bawk.