ZALEN July 2, 2025 : BJP Mizoram State President Dr K Beichhua, MLA chuan vawiin khan BJP Mizoram State Office, Upper Republic Mipui Run ah thuthar thehdarhtute kawmna hun a nei. 2028 inthlanah chuan sawrkarah an tel ngei tur thu a sawi.

Dr K Beichhua chuan, "Pathian leh kan hotute duhsakna changin, ka phuloh dinhmun BJP Mizoram State President hial mai dinhmunah ka lo awm thei hi ka lawm hle a, India Ram Prime Minister Pu Narendra Modi leh BJP National President Pu JP Nadda te hnenah lawmthu ka sawi bawk a, vawiinah hian BJP State President dinhmun ka luah hian Mizoram mipuite tawiawmna ka rawn dil nghal che u a ni," a ti.

BJP State President a nih anga a hmalakna tur sawiin, Christian te tan BJP a hlauhawm ti a Mizoram mipuite rilru hruaisual a awm tawh chu siam that a tum tih a sawi a. Kum 2028 MLA General Election lo awm tur ah a tam thei ang ber BJP MLA neih a, Sawrkarna siam chu an tum thu a sawi bawk.

Thuthar thehdartu ten Party thenkhatin sawrkara tel ve turin ZPM chu central lamin an nawr thin nia sawi leh an tel loh avanga an hrek ang sawi chungchang an zawhna chu, BJP President chuan an hriat ve loh thu a sawi a, a sawi ang hian 2028 inthlanah erawh sawrkara tel ngei an tum thu a sawi nawn. Thawhpui leh thawhpui lo inkar erawh a inan theih loh thu a sawi bawk. 

Mizoram inkalpawhna chungchang a kawng chhe lutuk chu vanduaithlak a ti a, NH 06 Kawnpui to Khamrang inkar kawngpui hi MPWD chan niin, thal lai pawhin kawng a tha lo hle mai a, Mizoram chaklakna pawimawh tak a ni. BJP chuan kawng pawimawh hi fur leh thal a tha taka Motor a tlan theih nan hma an lak tur thu a sawi bawk.

ATL ROAD tuna kawng chhiat vanga buaina pawh BJP chuan an ngaipawimawh hle dawn a, Mipui ten kawng chhiat vanga harsatna kan tawk nawn tawh loh nan a hmalak a tum thu a sawi.

BJP State President chu BJP Member lo ni tawh zawng zawngte, Party danga engemaw avanga lo peng te an awm thei a, tunah hian Mizoram leh hnamin hma a sawn zel theihna turin BJP Member lo ni tawh zawng zawng te chu BJP ah lo kir leh vek turin a sawm a, Mizoram mipuite, thalai lehkha thiam tak takte hmabak eng kan neih theihna tur atana BJP a lut a Mizoram tana hnathawh kawr hakpui turin a sawm bawk.