ZALEN July 18, 2025 : BJP Mizoram chuan vawiin hian Political Session neiin, inkhawm hi State Spokesperson K. Laldinthara chuan a kaihruai a, thusawitu BJP National Minority Morcha Secretary kaihruaia Delson Notlia, MDC chuan ZPM chu Congress leh MNF game khelah BJP hnuklut tawh lo turin a chah.

BJP National Minority Morcha Secretary Delson Notlia, MDC chuan, "ZPM unau-te hnena ka chah duh chu- Congress leh MNF game khelhna ah hian keini BJP hi vawi khatmah min hnûk lût tawh suh se" tih hi a ni. ZPM thalaiin Press Release an neih-ah khan 'MoRTH Minister leh CM-te meeting rah-chhuaka par ve lo tum tawh lo turin BJP Mizoram State President thar hi kan chah duh a ni' tih thu an chhuah a. Central Sorkar hi BJP leh a thawpui te siam, Pu Narendra Modi kaihhruai a ni a, 'ZPM' sawrkar (fa tak nilo) thu thlen aiin, mahni fa te thu thlen leh dil chu an ngai pawimawh zawk tih a lang a, Mizoram tan kan tih theih na zawn ah hma kan lo lak ve naah, hna chak zawka an thawh mek laia, min support tak a hneka Mipui harsatna sutkian a ni tur an do ta mai hi a mak hle a ni. Mizoram ṭhatna turah chuan tu pawhin hma kan la anga Mizoram tan anih chuan kan in lawmpui mai tur ah keini BJP Mizoram chuan kan ngai a ni," a ti.

Delson Notlia chuan, "Kan sawrkar hrawn mek hian Facebook-a tute emaw thu post chhang a, an insawifiah zel chuan, enchhin sawrkar hian hna an thawk hman lo palh ang tih a hlauhawm a ni. Tin, kan sawrkar hrawn mek hian awmze nei lovin BJP hi do ve tawh suh se, a chhan chu (NH-6 & 306) chungchangah hian kan thil sawi duh miah loh te min sawi luih tir palh ange," a ti.

BJP National Minority Morcha Secretary chuan, "Inthlan hmain Vanram Administration ang maia famkim sawrkar kalpui turin ZPM party an in zuar a, mahse an han sawrkar ta chiah a, an tum angin vanram administration a kalpui theih loh tih an hre leh si a; nitin insawifiah nan hun an khawhral reng mai a ni. Insawifiah reng lovin, hna thawk sela, Mizoram thatna tur chuan BJP pawhin puih kan in huam reng a ni," a ti.

Delson Notlia chuan, "Mizote hian tun hmain Congress kha Vai pawl/Hindu pawl tih tein kan lo sawi tawh thin a, tunah chuan Congress hian BJP than len a hlauh avangin hmana mipuiin an chirh theh thinna ang khan BJP chirh theh nan an hmang leh ta chiah a ni. Hindu-te hian Hindu turin min duh ngawt lova, Hindu nih a, Hindu dan zawm hi kan tribal nihna hian a pha lo sa nghal a ni. Varna pali hnuaia rin luh theih miah loh Mizo tribal-te hi a pawng a takin kan Hindu ngawt thei lo a ni. Tin, Central BJP-te hian Hindu turin min sawm ngai lova, kan ram leh hnam hmangaiha, dikna nena ram kaihruai turin min sawm zawk a ni," a ti bawk.