ZALEN May 8, 2025; Nimin tlaia Indona chhuah thulh atana Mock Drill hnuhnung zawk Black Out chuan zawm a hlawh tha tawk lo hle.

Tarlan tawh angin, nimin khan Indona thleng palh a mipui himna tura awmdan tur tih chhinna Civil Defence Mock Drill chu ram chhung hmun dangte rualin Aizawlah neih a ni a, thlawhna hmanga beihna (Air Raid) tawk angin Mock Drill hi neih a ni. Mock Drill thawh khatna chawhma dar 11 a neih chu tha taka tih a ni a, a thawh hnihna Black Out erawh chuan zawm a hlawh tha tawk lo hle. 

Ruahman danin tlai dar 6:30 - 6:35 chhungin Siren ti ri lehin Black Out hi ruahman a ni a, hemi chhung hian Aizawl khawpui chhungah power supply tih tawp vek a ni a, Black Out chhung hian lirtheite chu kawngpuiah an awmhmunah an ding a, lirthei engine leh light pawh off vek tura ruahman a ni.

Lirthei kal vel Aizawl khawpui tlangdungah chuan traffic police te puihna in zawm a hlawh tha thaw khat hle a, lirthei tam tak dingin engine te off a ni a. Hetihlai hian, a pen hleh kawng dangah te, chenna In leh sumdawnna hmunah te eng chhit ti thim lo erawh an tam hle thung.

#ZalenNews