ZALEN July 6, 2025: May 28, 2025 zing khawvar hmaa bomb puahnna hmun, Phuldungsei, Thaidawr tlangah Tripura State Rifle (TSR)-te an inkulh laiin Mizoram atangin police duty an la indah ve lo nia thudawn a ni.

Phuldungsei khua atanga ZALEN thudawn danin tun dinhmunah helai hmunah hian boruak duhawm lo thleng a awm zui tawh lo a, a ralmuang.

Hetih lai hian TSR chu Thaidawr tlang bulah hian inkulhin awmhmun an khuar reng a, hei hi tunhma atanga an lo kalpui tawh dan a ni.

Thudawnna chuan tun hnaia bomb puahna hmunah hian vawiin thlengin Mizoram sawrkarin police duty a la dah lo niin a sawi.

Hetihlai hian MZP General Headquarters hruaitute chu June 3, 2025 khan Home Minister K Sapdanga’n a sawm angin a pisaah an leng a, Thaidawr tlangah Mizoram sawrkarin IR police a dah dawn thu a lo hrilh niin an tar lang.

He an inkawmnaah hian Thaidawr tlang pan chhohna kawng sira Tripura sawrkarin guest house tur an sak chungchang leh Tripura sawrkar hmalak dan sawiho a ni a, MZP hruaitute chuan Tripura sawrkarin Rs. nuai 300 sengin guest house an sak mek thu leh TSR mi leh sate an duty reng thu sawiin, Mizoram police-te pawh duty ve nghal se an duh thu home minister hnenah an thlen a ni.

May 28, 2025 zing dar 2 leh dar 3 inkar vel khan Thaidawr tlang panna bula Tripura sawrkarin forest guest house an sak mek chu tu tih hriat lohten an bomb a, a chhe nasa hle.

Bomb puak hi gelatin nia rin a ni a, Tripura-in forest guest house an sak hi nikuma sak tawh niin tun dinhmunah an chawlhsan lai a ni.

Helai hmun hi Mizoram chhung niin, Tripura sawrkarin forest guest house an sak hi Mizoram pawl hrang hrangin an ngaimawh hle a, a hmunah pawh an lo tlawh fo tawh thin.