ZALEN July 13, 2025: Food Civil Supply & Consumer Affairs (FCS&CA) department hotuten Mizoram hmun hrang hrangah buhfai a chhekkhawl tam tawk a, manganna tur a awm lo tih an sawi.

ZALEN zawhna chhangin FCS&CA department hotute chuan furpui thleng mek mah se Mizoram hmun hrang hrangah buhfai chhekkhawl a tam tawk tih an sawi a, tun hnaiah National Food Security Act (NFSA) hnuaiah thla thum quota tum khata sem a nih bawk avangin buhfaiah mipui tan manganna tur a awm loh thu an sawi.

FCS&CA department hotute chuan kumin furpui thleng mekah mipuiten buhfaia harsatna an tawh loh nan theihtawp chhuah a nih thu te, fur laia kal/tlawhpawh harsatna thin khuaa kudamah pawh buhfai chhekkhawl vek tawh a nih thu an sawi bawk.

FCS&CA department hnuaiah hian supply centre 120 awmin heng centre-a godown awm zawng zawng belhkhawm hi 143 a ni a, godown-te capacity belhkhawm chu MT 45,780 a ni. 

Tun dinhmunah AAY (card eng) hnuaiah Mizoramah ration card 25,750 awmin chhungkua 62,964 vel an awm a. PHH (card pawl) hnuaiah ration card 1,50,555 awmin, chhungkaw 6,33,980 vel an awm thung.

Mizoram puma non-NFSA (card var) hnuaiah ration card 1,60,589 awmin chhungkaw 4,41,902 an awm mek.