ZALEN June 24, 2025; Ni 23.06.2025 (Thawhtanni) zana Central YMA Executive Committee thukhawm chuan kumina YMA Inkhawmpui lian vawi 75-na neih hun atan October 21-23, 2025 a ruat fel. 

CEC meeting hi Lalhmachhuana, President in a kaihruai a, Prof.Malsawmliana, General Secretary in tunhnaia pawl hmalakna Report a pe.

Meeting ah hian Sakawrdai-a YMA Inkhawmpui lian vawi 75-na neih hun atan October ni 21-23,2025 ruat a ni a. Inkhawmpui Programme Committee din nghal a ni bawk a, Chairman ah Prof. Lalnuntluanga, Vice President ruat a ni a, kumpuan thupui sawi turin Prof. Malsawmliana, General Secretary ruat a ni bawk. Heng bakah hian kumtina Group leh Branch inelna neih thin -Kumpuan bawhzui tha, Ramngaw leh nungcha humhalh tha, luidung humhalh tha, Branch chanchinbu tha leh YMA Chanchinbu la tha te buatsaih leh tum a ni.

Meeting ah hian July ni 19, 2025 ah OKM Home, Phunchawngah Free Health Clinic buatsaih an rel a; Assam-a Barak Valley huamchhunga YMA Branch ding thar 4 pawm a ni bawk a Central YMA in Direct in a awp dawn a ni.

#ZalenNews