ZALEN June 20, 2025 : Central YMA chuan vawiin khan Central YMA Hall-ah Myanmar Raltlan hruaitute kokhawmin infuihtharna hun an hmang a; Mizoram hmun hrang hranga Myanmar raltlan hruaitute an kalkhawm a, an tih tur leh tih loh turte an hrilh

He huna thusawitu CYMA General Secretary Prof. Malsawmliana chuan tun dinhmunah Myanmar atanga sahimna zawnga awm mek te hi mi 27,751 an nih thu sawiin, raltlante chu an awmna khua leh veng in inkaihhruaina an siam te leh sawrkar thuchhuahte ngaipawimawh a zawm theuh turin a chah a. Raltlante zingah ruihtheih thil leh sualna danga inhnamhnawihte dim an nih dawn loh thu leh dan hmanga hrem zel an nih tur thu te, Sawrkar ruahman anga Temporary ID Card nei vek tur te leh India khua leh tuite chauhin an neih theih Adhaar Card, EPIC, Driving Licence etc. te neih tum talh lo turin a chah. 

Raltlante chu kan unaute an nih angin harsatna an tawh leh puih an ngaihnaah YMA chuan a puih zel tur thu leh a thlahthlam dawn loh thu a sawi bawk. 

CYMA President Lalhmachhuana pawhin thu sawiin, Mizorama raltlan te dinhmun chungchangah infuihthar tulin kan hria a; boruak muanawm tak hnuaia kan awm theih nan mahni camp-ah theuh lo infuih thar turin a chah a, hnam bil leh chi bil boruak siam lo turin a chah bawk. 

Aizawl District Bawrhsap Er. Lalhriatpuia'n awrkar inkaihhruaina hrang hrangte a sawi a, Pu Stephen Lalrinawma, Sr. SP CID (SB) in India citizen te chauhin an neih theih Adhaar Card, Driving Licence etc. te neih tum lo tur in a chah a, ruihhlo a sumdawnna a inhnamhnawih lo turin a chah bawk. Excise & Narcotics Dept. Asst. Commissioner VL Vura Ralte pawhin raltlante chu ruihhlo a inhnamhnawih lo tur leh ruihhlo do kawnga thawhpui turin a sawm a ni. Raltlan hruaitute pawhin thusawina hun an hmang bawk. 

He hunah hian Aizawl leh Mizoram hmun hrang hranga Raltlan Camp- a awm hruaitute, Raltlan pawl hrang hranga hruaitu leh Chin Hills- a MP leh MLA te engemaw zat an tel a, an vaiin mi 60 chuang an tel.

He hun hi Prof. Lalnuntluanga, Vice President, CYMA in a kaihruai a, Fabian Lalfakawma, Asst. Secretary-in