ZALEN June 2, 2025 : Vawiin khan Chief Minister Lalduhoma hovin a office-ah ILP leh Railway Police chungchang sawihona meeting neih a ni a. Home Minister K. Sapdanga leh Official pawimawh te an tel.

Meeting hian ILP Guidelines thlirletna leh a thar tih belh tut rawtna te, online ILP Phase 2 kalpui dan tur te, permit in a phal chin baka rei lo cham ru te dapchhuahna leh Railway Police dinna tur chungchang te an sawi.

Vanlalmawia, Secretary, Home chuan Online Inner Line Permit kalpui mek chungchang sawifiahna a nei a, tih belh emaw siam that ngai, Deputy Commissioner zawng zawngte atanga rawtna an dawn te pawh a tarlang. 

Online ILP portal kalpui dan hi Lalrinfela, Informatics Officer, ICT chuan a entir (demonstrate) a. A kalpui dan tur tha zawk nia an ngaih te an sawiho nghal zel bawk. ILP hi online veka kalpui theih a la nih loh avangin hmun thenkhatah chuan tunhmaa kal dan (off line) anga kalpui a la ni.

DP & AR lam chuan a thuphungin Railway Police dinna hi a pawm tawh a, zirchianna neih chhoh mek a ni. Sairang Rel station hi June thla chanve velah chuan hawn theiha peih a ni dawn a. A rang lama hmalak a tul nia sawi a ni.