ZALEN July 7, 2025: Vawiin khan Imperial Hotel, New Delhi-ah Northeast state pasarih Chief Minister te leh an aiawh te chuan 16th Finance Commission member te nen inkawm hona hun an nei a, Mizoram Chief Minister Lalduhoma pawh telin Mizoram mamawh hrang hrangte a thlen. 

Chief Minister thil thlen langsar zualte chu: 

1. State sum bawm lian ber (devolution of taxes) tihpun chungchang.

2. ⁠Central sawrkarin state sorkar hnena pawisa a pek dawnin mihring tam lam chu criteria pakhat a ni a, hemi avang hian Mizoram ang mihring tlemnaah chuan kan tuar thin, hemi kaltlanga kan sum hmuh tihpun a nih theihna tur criteria a dah tel.

3. ⁠Chhiatrupna atana sum inpek thin (disaster risk index) hnuaiah hian chhiatna lian tham (major disaster) ah lirnghing, khawkheng, Cyclone leh tuilian dah thin a ni a. Mizoramin a tawrh nasat leimin, ram kang leh ruahbawhawk avanga chhiatna thleng te telh ve tura ngenna.

4. ⁠Mizoram chu tlangram chhengchhia leh inkalpawh harsatna anih avangin bungraw phurhna senso (transportation cost) chhut tel thin tura ngenna leh

5. ⁠District Council te tana sum tam zawk pe tura ngenna leh rural local body grant chhunzawm zel tura ngenna te chu a langsar zual an ni.

Meeting-ah hian Mizoram Chief Minister bakah Meghalaya Chief Minister Conrad Sangma te, Tripura Finance Minister Pranajit Singha Roy bakah state dang Chief Minister aiawh leh official pawimawhte an tel a. Northeast state aiawhte hian dilna intawm Joint Memorandum chu 16th Finance Commission hnenah hian an thehlut nghal a ni.

Kum nga chhung atana ram danpui Article 280 na anga Central sawrkar leh state sawrkar ten sum an insem dan tur duangtu 16 na, 16th Finance Commission rawtna (recommendation) hi nakkum April ni 1 atanga hman tan tur a ni a. 16th Finance Commission hian Mizoram pawh rawn tlawh tawhin, an hmalakna kal zelah vawiin hian hmarchhak state Chief Minister te nena inkawmna hun hi an buatsaih a ni.