ZALEN June 30, 2025: I&WRD Conference Hall, MINECO-ah kumin chhunga sawrkarin thlai thar lei a kalpui kharna hun vawiin khan buatsaih a ni a. Chief Minister Lalduhoma chuan khuallian niin a hmanpui a, loneitute kalsan an tum loh thu a sawi.

Chief Minister chuan a bul tan kum a ni a, inzir chungin an kal a, mahse an hlawhtling thawkhat a ti a. Loneitute pawh an lawma a hriat thu a sawi. Thlai pali an han tinzawn a, mahse Mizo buh pawh an han titel hram a. Thlai panga kan lei ta a ni, a ti. 

Thlai thlan bik 5 zingah Sawhthing leh Hmunphiahah tlem khaih lak zeuh a awm tih loh chu a dang 3 ah hian harsatna an tawk lo a. Hmunphiaha an buaina bul chu grade-a then tur an ti kha a ni a. Loneituten chu chu an harsat a, tun hnuah chuan grade a then an tum tawh loh thu a sawi.

February ni 20 atanga sawhthing lei kalpui a nih atangin vawin hi thla 4 leh ni 10-na chiah a ni a, tunah chuan a mothar a awm tawh a, khar rih mai hi tha-in an hria a ti.

Sawrkar an insengso a, cheng vaibelchhe za vel an sen ral a ring tih a sawi a, Theih tawka an hralh ve bakah Central sawrkar market intervention scheme atangin Cheng Vaibelchhe 9 vel hmuh ve an beisei thu sawiin Chief Minister chuan, "Loneitute hi kawng lakah kan kalsan dawn lo va, nakkum lamah pawh kan kalpui zel ang. Nakkum lam pawh khi a market a la tha dawn lovin kan hria a, mahse kan kal zel dawn. A rate chhiat kuma loneitute veng tura he policy hi siam a ni a. A rate that kumah chuan kan inrawlh a ngai lo zawk ang."

"A rate a lo chhiat khan he policy hian a thil tum a tihlawhtling a, loneituten rilru hah miah lovin cheng sawmnga-in an hralh thei a ni. Kum khat leh a chanve chhunga mipuite hnena pawisa thlen tam ber sawrkar kan niin ka ring," a ti.

Lalduhoma chuan, "Thil lawmawm tak a ken tel chu mipui moral a siam tha hi a ni. A thlawna dawn tumna a bo va, mi thawkrimte tan erawh chuan bituk awm miah lova sum lakluh theihna a ni. Tumah thlei bik nei lovin kan leisak a, huapzo takin kan kal. Chutihlaiin, min tih hmingchhiat tum ranin mi thenkhat an che thin tih kan hria a, a pawi kan ti hle. He policy hi kan za atan a ni tih i hrereng ang u," a ti bawk.

Dr. KC Lalmalsawmzauva, Adviser to CM & Co-Chairman MAMB chuan kumin chhunga thlai thar an lei dan report a pe a. Mizo buh hi quintals 1473 leiin, Rs. 44 lakh vel sawrkarin a seng a. Sawhthing hi June ni 27 thleng khan quintals 233,604 an lei tawh a, vawiin thlengin la buk. An lei tawh chinah support price hi Rs. 96.4 cr sawrkarin a pe tawh a ni. Aieng quintal 400 leiin, Hmarcha leisak ngai an awm lo. Hmunphiah hi empanelled buyers ten quintals 10552, non empanelled buyers ten quintals 27277 an lei a, ZOHANCO kaltlangin quintals 2498 lei a ni. He mi bikah hian sawrkarin Crore 2-a seng.