ZALEN, Apr. 23, 2025: Baptist Church of Mizoram (BCM)-in Mizoram Universal Health Care Scheme (MUHCS) an zawm dawn.

Christian Hospital, Serkawnin MUHCS an zawm leh zawm loh chungchangah Hospital Management Committee-in Committee sang zawka thlen tura a rel bawhzuina kal zelah Thawhlehni chawhnu khan BCM Headquarters Office, Committee Room No. 1-ah BCM Puipate, Medical & Health Director, Senior Doctor-te leh Mizoram health care hotute chu MUHCS chungchang sawi hovin an thukhawm.

Thutkhawmah hian MUHCS chungchanga hriat tur pawimawh hrang hrangte sawiho a nih bakah harsatna awm thei hrang hrangte, mipui tana hamthatna awm thei hrang hrangte sawiho a ni a. Hriatchian loh leh hriat belh ngai angte pawh zawhna leh chhanna hun awmin Mizoram health care atanga telte hian an chhang a ni.

Meeting chuan committee sang zawkah BCM-in MUHCS hi a zawm dawn leh zawm dawn loh thlen nise a lo tih chu Nilaini chawhma khan BCM Headquarters Meeting room No 1-a BCM Administrative Committee thukhawm chuan zawm ni se, lo bawhzuia hma la tur hian Hospital Management Committee kuta awm se tiin a rel a ni.